जळगाव : उभ्या असलेल्या बोलेरो कारमधून अज्ञात चोरट्यांनी २ लाख १४ हजार रुपयांची रोकड चोरून नेली. तर बसस्थानक आवारातून एका प्रवासी महिलेच्या गळ्यातून सोन्याचे मंगळसूत्र चोरून नेले. या घटना एक २३, तर एक २१ रोजी घडल्या. या प्रकरणी विविध पोलीस ठाण्यात गुन्हा दाखल करण्यात आला.
जळगाव शहरातील कांचन नगरात राहुल काशिनाथ कोळी (३०) हा तरुण आपला परिवारासह वास्तव्याला आहे. खाजगी वाहनावर तो चालक म्हणून नोकरीला आहे. दरम्यान त्याच्याकडे बोलेरो पिकअप (एमएच १९ सीवाय ७६८८) वाहन आहे. २२ जून रोजी रात्री ११ वाजता त्याने बोलेरो वाहन नशिराबाद गावाजवळील मण्यारखेडा फाट्याजवळ प्रगती रिसॉर्ट जवळ पार्किंगला लावली होती. मध्यरात्री अज्ञात चोरट्याने वाहनात ठेवलेले २ लाख १४ हजार रुपयांची रोकड चोरून नेली. ही घटना रविवारी २३ जून रोजी सकाळी ६ वाजता समोर आले त्यानुसार राहुल कोळी यांनी सायंकाळी ६ वाजता नशिराबाद पोलीस ठाण्यात तक्रार दिली. त्यानुसार अज्ञात चोरट्यांवर नशिराबाद पोलीस ठाण्यात गुन्हा दाखल करण्यात आला. या घटनेचा पुढील तपास हेड कॉन्स्टेबल प्रमोद पाटील हे करीत आहे.
दुसरी घटना अशी की, रेखा शरद सोनवणे (४५, रा. चांगदेवनगर, जामनेर) या महिला कामाच्या निमित्ताने जळगाव शहरात २१ जून रोजी सायंकाळी ७ वाजता आल्या होत्या. जळगाव शहरातील नवीन बसस्थानक आवारात आलेल्या असताना त्यांच्या गळ्यातून १८ हजार रुपये किमतीचे सोन्याचे मंगळसूत्र चोरून नेले.
ही घटना उघडकीला आल्यानंतर महिलेने सर्वत्र शोधाशोध केली. परंतु काहीही माहिती मिळाली नाही. अखेर रविवारी, २३ रोजी दुपारी अडीच वाजता महिलेने जिल्हापेठ पोलीस ठाण्यात धाव घेऊन तक्रार केली. त्यानुसार अज्ञात चोरट्यावर गुन्हा दाखल करण्यात आला. या घटनेचा पुढील तपास महिला पोलीस नाईक सुवर्णा तायडे या करीत आहे.
