---Advertisement---
जळगाव : शहरात सोनसाखळी चोरीच्या घटना दिवसेंदिवस वाढत आहेत. शिवशक्तीनगर रोड परिसरात नातीसोबत रात्री पायी फिरणाऱ्या कृषी विद्यालयात नोकरी करणाऱ्या ५४ वर्षीय महिला लिपिकाच्या गळ्यातील तब्बल एक लाख २३ हजार रुपये किमतीचे सोन्याचे मंगळसूत्र आणि पदक दुचाकीवरील दोन चोरट्यांनी भर रस्त्यात तोडून पळ काढला. ही घटना ३ नोव्हेंबरला रात्री सव्वानऊच्या सुमारास घडली.
शिवशक्ती नगरातील उषाबाई देविदास बोरसे या महात्मा फुले कृषी विद्यापीठ संलग्न कृषी विद्यालय येथे लिपिक म्हणून कार्यरत आहेत. त्या ३ नोव्हेंबर रोजी रात्री ९ वाजता नेहमीप्रमाणे त्यांची नात कनिष्का हिच्यासोबत शिवशक्ती नगर रोडवर पायी फिरण्यासाठी गेल्या होत्या. रात्री सव्वानऊच्या सुमारास त्या सुनील रत्नपारखे यांच्या घरासमोरून परत घरी जात असताना, त्यांच्या समोरून काळ्या रंगाच्या पत्सर मोटारसायकलवरून आलेल्या दोन दोघांनी त्यांना लक्ष्य केले. त्यातील पाठीमागे बसलेल्या २५ ते ३० वयोगटातील, सडपातळ बांध्याच्या आणि काळी टोपी घातलेल्या व्यक्तीने उषाबाई यांचे सोन्याचे मंगळसूत्र व त्यामधील पदक ओढून तोडले आणि अंधाराचा फायदा घेत दोघांनी मोटारसायकलवरून तत्काळ पळ काढला. याप्रकरणी पोलिसांत गुन्हा दाखल करण्यात आला आहे.
