---Advertisement---
एरंडोल : येथे किरकोळ कारणावरून झालेल्या वादात चॉपरने केलेल्या हल्ल्यात युवक गंभीर जखमी झाला. त्याच्यावर जळगाव येथील खासगी रुग्णालयात उपचार सुरू आहेत. पोलिसांनी तीन संशयितांना अटक केली आहे. युवकावर चॉपरने हल्ला केल्यामुळे शहरात तणावपूर्ण वातावरण निर्माण झाले असून, नागोबा मढी परिसरात पोलीस बंदोबस्तात वाढ करण्यात आली आहे.
याबाबत पोलिसांकडून मिळालेली माहिती अशी, की निहीर लक्ष्मण मराठे व त्याचा मित्र प्रसाद सुनील पाटील हे मोटारसायकल (क्रमांक एमएच-१९ डीएन-०८४२) ने बुधवारी रात्री आठ वाजेच्या सुमारास कैटवाडी येथे मित्र ऋषी पाटील यास भेटण्यासाठी गेले होते. ऋषी पाटील घरी नसल्यामुळे ते परत येत असताना बापू बन्सी महाजन यांचे घरासमोर यशवंत पाटील, गजानन पाटील यांनी मोटारसायकल अडवून तुम्ही या गल्लीत का आले, असे विचारून शिवीगाळ केली. प्रसाद पाटील याने शिवीगाळ का करीत आहात असे विचारले असता यशवंत पाटील याने पुन्हा शिवीगाळ करून तुम्हाला आज जिवंत ठेवणार नाही असे बोलून कमरेला लावलेला चॉपर काढून प्रसाद याचेवर हल्ला केला. निहीर मराठे याने प्रसादला वाचवण्याचा प्रयत्न केला असता त्याच्या हातास दुखापत झाली. त्यानंतर यशवंत पाटील याने पुन्हा प्रसाद पाटील याच्या पोटावर चॉपरने वार केल्यामुळे तो गंभीर जखमी होऊन मोटार सायकलवरून खाली पडला. त्यानंतर गजानन पाटील याने पुन्हा प्रसाद याच्या पायावर तलवारीने वार करून जखमी केले त्याचवेळी यशवंतचे वडील शंकर पाटील लाकडी दांडका घेऊन आले व प्रसादाच्या डोक्यावर व पायावर मारहाण केली. गंभीर जखमी झालेल्या प्रसाद यास ग्रामीण रुग्णालयात नेले असता त्याच्यावर प्राथमिक उपचार केल्यानंतर त्यास जळगाव येथे खासगी हॉस्पिटलमध्ये दाखल करण्यात आले असून उपचार सुरू आहेत. याबाबत निहीर मराठे याने दिलेल्या तक्रारीवरून शंकर पाटील, गजानन पाटील, यशवंत पाटील यांच्याविरोधात गुन्हा दाखल करण्यात आला असून पोलिसांनी तिघाही संशयितांना अटक केली आहे. पोलीस निरीक्षक नीलेश गायकवाड पुढील तपास करीत आहेत.
दरम्यान, युवकावर प्राणघातक हल्ला झाल्याचे समजताच कैटवाडी व नागोबा मढी परिसरात तणावाचे वातावरण निर्माण झाले होते. पोलीस निरीक्षक नीलेश गायकवाड पोलीस पथकासह घटनास्थळी दाखल झाल्यामुळे पुढील अनर्थ टाळला. अमळनेर विभागाचे उपविभागीय पोलीस अधिकारी विनायक कोटे यांनी घटनास्थळी भेट देऊन माहिती जाणून घेतली. नागरिकांनी अफवांवर विश्वास ठेवू नये, असे आवाहन त्यांनी केले. चॉपर हल्ल्यात जखमी झालेल्या प्रसादची प्रकृती गंभीर आहे. नागोबा मढी परिसरात अतिरिक्त पोलीस बंदोबस्त वाढवण्यात आला आहे.
