अनधिकृतपणे गर्भलिंग निदान करणाऱ्या सोनोग्राफी सेंटरवर धुळे महापालिकेच्या आरोग्य विभागाने छापेमारी केली आहे. या कारवाईत डॉक्टरांना ताब्यात घेण्यात आले आहे. धुळे शहरातील साक्रीरोड परिसरातील सोनोग्राफी सेंटरवर हि कारवाई करण्यात आली आहे.
धुळे महानगरपालिका प्रशासन आणि जिल्हा प्रशासनाला या अनधिकृत गर्भपात केंद्र संदर्भात तक्रार प्राप्त झाली होती. या माहितीच्या आधारावर महापालिकेच्या आरोग्य विभागाने हि कारवाई केली आहे. धुळ्यातील साक्री रोड परिसरातील अनधिकृत सोनोग्राफी केंद्रावर ही कारवाई करण्यात आली आहे. याठिकाणी गर्भपात करण्याच्या तयारीत असलेल्या डॉक्टरांना ताब्यात घेण्यात आले आहे.
धुळे महानगरपालिकेच्या आरोग्य विभागाच्या पथकाने छापा टाकला असता या ठिकाणाहून गर्भपात केलेले एक स्त्री जातीचे अर्भक आणि आणखी दुसरे गर्भपात करण्याच्या तयारीत असलेली गर्भवती महिला देखील पथकास आढळून आली आहे. तसेच येथील महिला डॉक्टरला पथकाने ताब्यात घेतले आहे. सदर ठिकाणी अनधिकृतपणे गर्भपात करताना लागणारे सर्व साहित्य देखील आरोग्य पथकाने जप्त केले आहे.
