अमळनेर : भरधाव चारचाकी वाहनाने आठ वर्षीय बालिकेला जोरदार धडक दिल्याने तिचा अंत झाल्याची दुर्दैवी घटना घडली. धडक देऊन पळून जाण्याचा प्रयत्नांत असतांना चालकाला गावकऱ्यांनी पकडून मारवाड पोलिसांच्या ताब्यात दिले. त्याच्यावर गुन्हा दाखल करण्यात आला आहे.
गुरुवार , २६ रोजी सायंकाळी ५.३० वाजता संगीत विजय नाईक ह्या आपली मुलगी रेखमा विजय नाईक (वय ८) हिच्यासोबत पाडसे रस्त्याच्या कडेने विहिरीवर पाणी भरण्यास जात होते. यावेळी पाडसेकडून चौबारीकडे भरधाव वेगाने जाणाऱ्या चारचाकी वाहनाने (क्रमांक एमएच ०२ बीजे ५४२०) लहानग्या रेखमा जोरदार धडक दिली. या अपघातातील वाहनचालकाने अमळनेरच्या दिशेने पोबारा केला. मुलीचे वडील विजय नाईक व ग्रामस्थांनी मुलीकडे धाव घेत तिला खाजगी वाहनाने अमळनेर ग्रामीण रुग्णालयात दाखल केले असता डॉक्टरांनी तपासून मृत घोषित केले.
या अपघातप्रकरणी मारवड पोलिसांत गुन्हा नोंदविण्यात आला आहे. पुढील तपास हेकॉ शरीफ पठाण हे करीत आहेत. अपघात करुन चालक पळून गेल्याचे कळताच काही ग्रामस्थांनी अमळनेरकडे धाव घेतली. त्यांनी संबंधित वाहनचालकाला पकडत चोप दिला. यावेळी मारवड पोलिसांनी सदर चालकास व वाहनाला ताब्यात घेतले आहे. विकास प्रकाश वानखेडे (वय २५, रा. भालेगाव ता. मलकापूर जि. बुलढाणा) असे संशयित आरोपीचे नाव आहे. त्याला शुक्रवारी अमळनेर सत्र न्यायालयात हजर केले असता जामीन मंजूर केला आहे.
