पोलिस दलातील अंमलदाराकडून कर्तव्यात कसूर, सेवेतून बडतर्फ

नंदुरबार : गुन्ह्यातील मुख्य संशयिताचा गुन्हेगारीचा पूर्वइतिहास माहिती असतानाही त्याच्यासोबत राहणे, तसेच गुन्हा घडतेवेळी संशयितास ताब्यात घेणे, नजीकच्या पोलिस ठाण्यात लगेच घटनेबाबत कळविणे आवश्यक असतानाही कर्तव्यात कसूर केल्याप्रकरणी तळोदा येथील पोलिस शिपायास सेवेतून बडतर्फ करण्यात आले. चेतन निंबाजी चौधरी असे बडतर्फ केलेल्या पोलिस शिपायाचे नाव आहे.

शहरातील उपनगर पोलिस ठाण्याच्या हद्दीत घडलेल्या जय वळवी नामक व्यक्तीच्या खून प्रकरणातील मुख्य संशयित सूर्यकांत सुधाकर मराठे याच्यासोबत कपडे खरेदीसाठी गेलेले तळोदा येथील पोलिस शिपाई चेतन निंबाजी चौधरी यांच्यासह इतर संशयितांविरुद्ध उपनगर पोलिस ठाण्यात गुन्हा दाखल करण्यात आला होता.

गुन्ह्यातील मुख्य संशयित सूर्यकांत मराठे याचा गुन्हेगारीचा पूर्वइतिहास माहिती असतानाही त्याच्यासोबत राहणे तसेच गुन्हा घडतेवेळी संशयितास ताब्यात घेणे, नजीकच्या पोलिस ठाण्यात लगेच घटनेबाबत कळविणे आवश्यक असतानाही पोलिस शिपाई चेतन चौधरी यांनी कर्तव्यात बेशिस्त, बेजबाबदार व निष्काळजी आणि हलगर्जीपणाचे वर्तन केले. चेतन चौधरी यांचे अशा नैतिक अधःपतन दर्शविणाऱ्या वर्तनामुळे पोलिस दलाची प्रतिमा मलिन झाली. त्याअन्वये जिल्हा पोलिस अधीक्षक श्रवण दत्त. एस यांनी पोलिस शिपाई चेतन चौधरी यास भारतीय संविधान १९५० मधील अनुच्छेद ३११ (२) (ब) मधील तरतुदीनुसार शासकीय सेवेतून बडतर्फ केले आहे.

अन् शिस्तभंगविषयक कारवाईचा इशारा

जिल्हा पोलिस दलात शिस्त, प्रामाणिकपणा व पारदर्शकता यांना सर्वोच्च प्राधान्य देण्यात येते. सेवेत असताना कोणत्याही अधिकारी व अंमलदाराने नियमबाह्य वर्तन केल्यास त्यांच्यावर कठोर शिस्तभंगविषयक कारवाई करण्यात येईल, असा इशारा जिल्हा पोलिस अधीक्षक श्रवण दत्त. एस यांनी यावेळी दिला आहे.