तरुण भारत लाईव्ह न्यूज । १ डिसेंबर २०२२ । सध्या रोजच अपघात होत असून धुळ्यातून बस उलटून भीषण अपघात झाल्याची घटना समोर आली आहे. ही घटना आज सकाळच्या सुमारास घडली असून यात जवळपास २० प्रवासी जखमी झाले आहेत. जखमींना तातडीने धुळे जिल्हा रुग्णालयात दाखल करण्यात आलं आहे. समोरून येणाऱ्या वाहनाने हुलकावणी दिल्याने हा अपघात झाल्याची प्राथामिक माहिती मिळत आहे.
मिळालेल्या माहितीनुसार, अपघातग्रस्त बस ही चाळीसगाव येथून प्रवाशांना घेऊन अक्कलकुवाकडे निघाली होती. सकाळी साडेसात वाजेच्या सुमारास बस धुळे तालुक्यातील तरवाडे गावाजवळ आली, त्यात सकाळच्या सुमारास शाळेत जाणाऱ्या विद्यार्थ्यांची संख्या मोठ्या प्रमाणात होती.
एका वाहनाने बसला हुलकावणी दिल्याने बस थेट रस्त्याच्या कडेला उलटली
विद्यार्थी आणि प्रवाश्यांना घेऊन ही बस धुळ्याकडे रवाना झाली. तरवडे गाव सोडून 2 किलोमीटर अंतरावर धुळ्याकडून चाळीसगावकडे भरधाव वेगात येणाऱ्या एका वाहनाने बसला हुलकावणी दिली. यावेळी बस थेट रस्त्याच्या कडेला जाऊन उलटली. या भीषण अपघातात जवळपास २० प्रवासी जखमी झाले आहेत. त्यात शाळकरी विद्यार्थ्यांची संख्या अधिक असल्याची माहिती मिळत आहे.
दरम्यान, अपघाताची माहिती मिळताच, स्थानिक नागरिकांसह पोलिसांनी घटनास्थळी धाव घेतली. बसमध्ये अडकून पडलेल्या प्रवाशांना आणि विद्यार्थ्यांना पोलिसांनी स्थानिक नागरिकांच्या मदतीने बाहेर काढले. जखमींना तातडीने उपचारासाठी जवळच्या धुळे शासकीय रुग्णालयात दाखल करण्यात आला आहे. सुदैवाने बसचा वेग कमी असल्याने या घटनेत कोणतीही जीवितहानी झालेली नाही. मात्र, अपघातात बसचे मोठ्या प्रमाणात नुकसान झाले आहे.
