Robin Uthappa Arrest Warrant: टीम इंडियाचा एकेकाळी प्रमुख खेळाडू असणारा माजी क्रिकेटर रॉबिन उथप्पाच्या अडचणीत काहीसा वाढ होताना दिसत आहे. त्याच्याविरुद्ध अटक वॉरंट जारी करण्यात आले आहे. ही बातमी समोर आल्यानंतर क्रिकेट विश्वात खळबळ उडाली आहे.
पीएफ घोटाळ्याचा आरोप
वास्तविक, माजी क्रिकेटपटू रॉबिन उथप्पा यांच्यावर भविष्य निर्वाह निधी घोटाळ्याचा आरोप आहे. त्याच्याविरुद्ध हे अटक वॉरंट प्रादेशिक पीएफ आयुक्त सदक्षरी गोपाल रेड्डी यांनी जारी केले आहे. यासोबतच पोलिसांनी हे प्रकरण गांभीर्याने घेऊन आवश्यक ती कारवाई करण्याच्या सूचनाही त्यांनी दिल्या आहेत.
उथप्पा या कंपनीत व्यवस्थापक
सेंच्युरीज लाइफस्टाइल ब्रँड प्रायव्हेट लिमिटेड कंपनीचे व्यवस्थापन रॉबिन उथप्पा पाहत होता. आता रॉबिनवर आरोप आहे की त्याने कंपनीच्या कर्मचाऱ्यांच्या पगारातून पीएफ कापला आणि नंतर तो त्यांच्या खात्यातही जोडला नाही. अहवालानुसार, हा संपूर्ण घोटाळा 23 लाख रुपयांचा असल्याचे सांगण्यात येत आहे.
पुलकेशीनगर पोलिसांना पत्र लिहून आयुक्त गोपाल रेड्डी यांनी या वॉरंटची अंमलबजावणी करण्याचे सांगितले आहे. दुसरीकडे, उथप्पाने आपले निवासस्थान बदलले आहे, त्यामुळे पोलिसांना हे वॉरंट पीएफ कार्यालयात परत करावे लागले. त्यानंतर पोलीस आणि पीएफ विभाग माजी क्रिकेटपटूच्या निवासस्थानाचा शोध घेत आहेत. ही बाब कर्मचाऱ्यांच्या सुरक्षेशी निगडित असल्याने याकडे गांभीर्याने पाहिले जात आहे. सध्या पोलीस आणि पीएफ विभाग हे दोन्ही मिळून तपास करत आहेत.
