सहाय्यक महसूल अधिकाऱ्यास दोन हजाराची लाच घेताना पकडले

Jalgaon News : लाचलुचपत प्रतिबंधक विभागाने जळगाव जिल्हाधिकारी कार्यालयात सापळा रचून लाच स्वीकारणाऱ्या अभिलेख शाखेतील सहाय्यक महसूल अधिकाऱ्यांसह खासगी पंटरास तक्रारदाराकडून दोन हजारांची लाच स्वीकारताना रंगेहात अटक केल्याने खळबळ उडाली. या प्रकरणी जिल्हापेठ पोलीस ठाण्यात गुन्हा दाखल करण्याची प्रक्रिया सुरू आहे.

याबाबत तक्रारदाराने दिलेल्या तक्रारीत म्हटले आहे की, गावातील अतिक्रमण प्रकरणातील कागदपत्रांच्या प्रती मिळवण्यासाठी १६ जून २०२५ रोजी जिल्हाधिकारी कार्यालयात अर्ज केला होता. त्यानंतर तो वेळोवेळी कार्यालयात जाऊन संबंधित अधिकारी आणि खासगी व्यक्तींच्या संपर्कात होता. यादरम्यान संजय प्रभाकर दलाल (वय ५८) यांनी ‘शासकीय फी व झेरॉक्स १४०० रुपये व आमचे ६००/- रुपये, असे सांगून दोन हजार रुपयांची लाच मागितली.

सहाय्यक महसूल अधिकारी प्रशांत सुभाष ठाकूर (वय ४९) यांनी लाच स्वीकारण्यासाठी प्रोत्साहन दिले. तक्रारदाराने तक्रार दाखल केल्यानंतर लाचलुचपत प्रतिबंधक विभागाने पडताळणी केली आणि बुधवारी (२३ जुलै) दुपारी सापळा रचून सहाय्यक महसूल अधिकाऱ्यासह दोघांना रंगेहात पकडले. तपासात ८८० रुपये शासकीय शुल्क आणि ११२० रुपये लाच रक्कम असल्याचे निष्पन्न झाले आहे. या प्रकरणी जिल्हापेठ पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू आहे.