AUS vs IND 2nd Test: ऑस्ट्रेलियन संघाने बॉर्डर गावसकर ट्रॉफीतील दुसऱ्या कसोटी सामन्यात भारतीय संघाचा 10 गडी राखून पराभव करत मालिकेत 1-1 अशी बरोबरी साधली आहे. टीम इंडियाने ऑस्ट्रेलियाला विजयासाठी अवघ्या 19 धावांचं आव्हान दिलं होतं. ऑस्ट्रेलियाने हे आव्हान एकही विकेट न गमावता 3.1 ओव्हरमध्ये पूर्ण केलं. या सामन्यात रोहित शर्मा, विराट कोहली, केएल राहुल आणि यशस्वी जैस्वाल सारखे स्टार फलंदाजांना ऑस्टेलियाच्या गोलंदाजांनी धूळ चारली आहे.
ऑस्ट्रेलियाने या विजयासह 5 सामन्यांच्या मालिकेत 1-1 ने बरोबरी केली आहे.ट्रेव्हिस हेड, मिचेल स्टार्क आणि पॅट कमिन्स यांचे योगदान ऑस्ट्रेलियाच्या विजयासाठी फायदेशीर ठरले. तर दुसरीकडे कॅप्टन रोहित शर्मा याच्या नेतृत्वातील हा सलग चौथा पराभव भारतीय संघाच्या पदरी पडला आहे. याआधी न्यूझीलंडने रोहितच्या नेतृत्वात भारताला 3-0 ने व्हाईटवॉश दिला. त्यानंतर आता हिटमॅनच्या कॅप्टन्सीत भारताला पुन्हा पराभूत व्हावं लागलं आहे.
भारताविरुद्धचा दुसरा सामना जिंकल्यानंतर ऑस्ट्रेलियन संघ पॉइंट टेबलमध्ये पहिल्या स्थानावर पोहोचला आहे. ऑस्ट्रेलियाने एकूण 14 सामने खेळले आहेत, त्यापैकी 9 जिंकले आहेत आणि त्यांचे पीसीटी 60.71 आहे. दुसरीकडे, भारतीय संघाला पराभवाचा फटका बसला आहे. भारतीय संघ गुणतालिकेत पहिल्या स्थानावरून तिसऱ्या स्थानावर घसरला आहे. भारतीय संघाने आतापर्यंत 16 सामने खेळले आहेत, त्यापैकी 9 जिंकले आहेत आणि 6 गमावले आहेत. त्याची PCT 57.29 आहे.
