Axiom 4 Mission : ॲक्सिओम मोहिमेंतर्गत आंतरराष्ट्रीय अंतराळ स्थानकावर जाण्यापूर्वी भारतीय अंतराळवीर शुभांशू शुक्ला विलगीकरणमध्ये गेले आहेत. त्यांच्यासोबत मोहिमेतील इतर तीन अंतराळवीरही आहेत. २६ मे रोजी ॲक्स-४ टीम फ्लोरिडाला आली आणि त्यांचा दोन आठवड्यांचा विलगीकरण कालावधी सुरू झाला. त्यांचा पहिला दिवस पूर्ण झाला. हे अभियान आंतरराष्ट्रीय अंतराळ स्थानकाकडे जाण्यासाठी केले जात आहे. हे ॲक्सिओम स्पेस, स्पेसएक्स आणि नासा संयुक्तपणे पूर्ण करतील.
हे अभियान ८ जून रोजी किंवा त्यापूर्वी फ्लोरिडा येथील केनेडी स्पेस सेंटर येथून प्रक्षेपित होण्याची शक्यता आहे. हे अभियान भारत, पोलंड आणि हंगेरीसाठी ऐतिहासिक आहे. मागील ४० वर्षांहून अधिक काळातील या देशांचा हा पहिलाच सरकार प्रायोजित अंतराळ प्रवास आहे. ॲक्सिओम मिशन ४ मध्ये चार देशांतील चार अंतराळवीर ८ जून रोजी १४ दिवसांसाठी अंतराळ स्थानकात जाणार आहेत. नासा आणि इसो यांच्यातील करारानुसार, ग्रुप कॅप्टन शुभांशू शुक्ला यांची या मोहिमेसाठी निवड करण्यात आली आहे
मोहीम यशस्वी होण्याचा विश्वास
ॲक्सिओम मोहीम यशस्वी होईल याबद्दल मला पूर्ण विश्वास आहे. व्यावसायिक अंतराळ उड्डाणासाठी हा एक मैलाचा दगड ठरेल. ॲक्सिओम स्पेसने एका कार्यक्रमात मोहिमेवर जाणाऱ्या टीमला निरोप दिला. अंतराळात जाण्यापूर्वी विलगीकरण हा एक आवश्यक टप्पा आहे. यात संपूर्ण टीमला विलगीकरणात ठेवले जाते. जेणेकरून ते पूर्णपणे निरोगी राहतील आणि मोहिमेदरम्यान त्यांना कोणताही संसर्ग होणार नाही.
शुभांशूसोबत जाणार आणखी तीन अंतराळवीर
ॲक्सिओम ४ मोहिमेच्या टीममध्ये भारत, पोलंड आणि हंगेरीचे सदस्य आहेत. १९७८ नंतर स्लावोज उइनान्स्की हे पोलंडचे अंतराळात जाणारे दुसरे अंतराळवीर असतील. १९८० नंतर टिबोर कापू हे अंतराळात जाणारे दुसरे हंगेरियन अंतराळवीर असतील. अमेरिकन पेगी व्हिटसनची ही दुसरी व्यावसायिक मानवी अंतराळ उड्डाण मोहीम आहे.
ड्रॅगन कॅप्सूलमधून करतील उड्डाण
हे अंतराळवीर एलन मस्क यांच्या कंपनी स्पेसएक्सच्या ड्रॅगन कॅप्सूलमध्ये उड्डाण करतील. हे अभियान फ्लोरिडा येथील नासाच्या केनेडी स्पेस सेंटरमधून फाल्कन-९ रॉकेटद्वारे प्रक्षेपित केले जाईल. अंतिम मंजुरी आणि मोहिमेच्या तयारीच्या आधारे प्रक्षेपण तारीख जाहीर केली जाईल.
मोहिमेचा उद्देश
ॲक्स-४ चा मुख्य उद्देश अंतराळात वैज्ञानिक संशोधन, तंत्रज्ञानाचे प्रात्यक्षिक करणे आहे. हे अभियान ॲक्सिओम स्पेसच्या खाजगी अंतराळ प्रवासाला प्रोत्साहन देण्याच्या आणि भविष्यात व्यावसायिक अंतराळ स्थानक ॲक्सिओम स्टेशन स्थापन करण्याच्या योजनांचा एक भाग आहे.
वैज्ञानिक प्रयोग : सूक्ष्म गुरुत्वाकर्षणात विविध प्रयोग करणे.
तंत्रज्ञान चाचणी : अंतराळात नवीन तंत्रज्ञानाची चाचणी आणि विकास. आंतरराष्ट्रीय सहकार्यः विविध देशांतील अंतराळवीरांना एक व्यासपीठ उपलब्ध करून देणे. शैक्षणिक उपक्रमः अंतराळातून पृथ्वीवरील लोकांमध्ये प्रेरणा आणि जागरूकता पसरवणे.
