दिल्ली : बुधवारी २६ जून रोजी न्यायालयात सुनावणी सुरू असताना दिल्लीचे मुख्यमंत्री अरविंद केजरीवाल यांची प्रकृती खालावली. मुख्यमंत्री केजरीवाल यांची साखरेची पातळी खाली गेली आहे. यानंतर त्यांना दुसऱ्या खोलीत बसवण्यात आले. त्यांना चहा आणि बिस्किटे देण्यात आली.
यावेळी मुख्यमंत्री केजरीवाल यांच्या पत्नी सुनीता केजरीवालही कोर्ट रूममध्ये उपस्थित होत्या. एएनआय या वृत्तसंस्थेने जारी केलेल्या व्हिडिओमध्ये त्या दिसत आहेत. दिल्ली अबकारी धोरण प्रकरणी सीबीआयने मुख्यमंत्री केजरीवाल यांना आज अटक केली आहे. यापूर्वी ईडीने त्याला २१ मार्च रोजी अटक केली होती.
काय आहे प्रकरण
दिल्लीचे मुख्यमंत्री अरविंद केजरीवाल यांना बुधवारी (२६ जून) सीबीआयने अटक केली. दिल्ली दारू धोरण प्रकरणी केजरीवाल यांना अटक करण्यात आली आहे. सीबीआयने केजरीवाल यांना दिल्लीच्या राऊस एव्हेन्यू न्यायालयात हजर केले होते, जिथे आम आदमी पक्षाच्या (आप) प्रमुखाची चौकशी करण्यासाठी तपास यंत्रणेने त्यांच्या कोठडीची मागणी केली होती. सीबीआय अधिकाऱ्यांनी मंगळवारी (२५ जून) संध्याकाळी केजरीवाल यांची तिहार तुरुंगात चौकशीही केली होती.
