बारावी CBSC बोर्ड परीक्षेचापेपर आणि राज्यातील सीईटी परीक्षेची तारीख एकत्र आल्याने राज्यातील हजारो विद्यार्थ्यांमध्ये संभ्रम निर्माण झाला आहे. राज्य सीईटी सेलने नुसतेच विविध अभ्यासक्रमांसाठी होणाऱ्या प्रवेश परीक्षांचे वेळापत्रक जाहीर केले.
1 ते 4 एप्रिल दरम्यान एकीकडे सीबीएसई बोर्डाची परीक्षा असताना याच तारखांमध्ये बीसीए,बीबीए,बीएमएस, बीबीएम आणि त्यासोबतच 5 वर्षाच्या एलएलबी अभ्यासक्रमाची सीईटी परीक्षा येत असल्याने विद्यार्थ्यांची अडचण झाली आहे. मात्र, यामध्ये 4 एप्रिल रोजी असलेला सीबीएसईचा मानसशास्त्राचा पेपर आणि एमएएच-एलएलबी पाच वर्षांच्या अभ्यासक्रमासाठीची सीईटी परीक्षा एकाच दिवशी नियोजित आहे. त्यामुळे हजारो विद्यार्थी संभ्रमावस्थेत आहेत.
बारावी सीबीएसई बोर्ड परीक्षांचे 1 ते 4 एप्रिल दरम्यान इतिहास, भाषा विषय आणि होम सायन्स आणि मानसशास्त्र या विषयांचे सलग चार दिवस पेपर असणार आहेत. तर 4 एप्रिलला एलएलबी पाच वर्षे अभ्यासक्रमाची सीईटी परीक्षा नियोजित आहे. त्याच दिवशी बारावी सीबीएससी बोर्डाच्या सायकॉलॉजीचा पेपर असणार आहे. त्यामुळे सीईटी सेलने 1 ते 4 एप्रिल रोजी आयोजित केलेल्या परीक्षांच्या वेळापत्रकामध्ये बदल करावा, अशी मागणी विद्यार्थी आणि पालकांकडून करण्यात आली आहे.
