---Advertisement---
Central Railway : मध्य रेल्वेने विनातिकीट प्रवाशांना रोखण्यासाठी आपले प्रयत्न वाढवले आहेत. जोरदार आणि नियमित तिकीट तपासणी मोहिमांद्वारे, रेल्वेने आर्थिक वर्ष २०२५-२६ (एप्रिल ते ऑगस्ट २०२५) दरम्यान लक्षणीय परिणाम साधले आहेत. या काळात, मध्य रेल्वेच्या तिकीट तपासणी टीमने तिकीटाशिवाय, अयोग्य तिकीटासह किंवा अवैध प्रवास करणाऱ्या १७.१९ लाख प्रवाशांना ताब्यात घेतले आणि विक्रमी असा १०० कोटी पेक्षा अधिकचा दंड वसूल केला.
ऑगस्ट २०२५ महिन्यात, मध्य रेल्वेच्या तिकीट तपासणी टीमने २.७६ लाख प्रवाशांना विनातिकीट/वैध तिकीटाशिवाय प्रवास करताना ताब्यात घेतले, जे ऑगस्ट २०२४ मधील २.३४ लाख प्रवाशांशी तुलना करता १८% वाढ दर्शवते.
ऑगस्ट २०२५ मध्ये विनातिकीट/वैध तिकीटाशिवाय प्रवास करणाऱ्यांकडून रु.१३.७८ कोटी दंड वसूल केला गेला, तर ऑगस्ट २०२४ मध्ये या दंडाची रक्कम रु८.८५ कोटी होती, यामुळे ५५% पेक्षा जास्त वाढ दिसून येते.
मध्य रेल्वे अनधिकृत प्रवाशांना शोधण्यासाठी बहुआयामी धोरण अवलंबते ज्यामध्ये स्टेशन तपासणी, अ‍ॅम्बुश तपासणी, किल्ल्याची तपासणी, सघन तपासणी आणि मेगा तिकीट तपासणी मोहिमा समाविष्ट आहेत. ही कारवाई मेल/एक्सप्रेस गाड्या, प्रवासी गाड्या, विशेष गाड्या तसेच मुंबई आणि पुणे विभागातील उपनगरीय गाड्यांमध्ये केली जाते.
तिकीट फसवणूक रोखण्यासाठी आणि महसूलाची हानी टाळण्यासाठी मध्य रेल्वेने महत्त्वपूर्ण पाऊल उचलत UTS मोबाइल अॅपद्वारे स्थिर QR कोडने तिकीट बुकिंग थांबवली आहे, कारण प्रवाशांकडून त्याचा व्यापक गैरवापर झाल्याचे अहवाल प्राप्त झाले होते.
QR कोड प्रणाली बंद केल्यामुळे पेपरलेस तिकीटिंगच्या गैरवापरीवर आता नियंत्रण आले आहे.
मध्य रेल्वे द्वारे प्रवाशांना आवाहन करण्यात येते की, योग्य आणि वैध तिकीट खरेदी करून सन्मानपूर्वक आणि जबाबदारीने प्रवास करावा, जेणेकरून असुविधा आणि दंड टाळता येईल.
आर्थिक वर्ष २०२५-२६ (एप्रिल ते ऑगस्ट-२०२५) दरम्यान वसूल केलेल्या दंडाची रक्कम
भुसावळ विभागात – ४.३४ लाख प्रकरणांमधून ३६.९३ कोटी रुपये,
मुंबई विभागात – ७.०३ लाख प्रकरणांमधून २९.१७ कोटी रुपये,
नागपूर विभागात – १.८५ लाख प्रकरणांमधून ११.४४ कोटी रुपये
पुणे विभागात – १.८९ लाख प्रकरणांमधून १०.४१ कोटी रुपये
सोलापूर विभागात – १.०४ लाख प्रकरणांमधून ५.०१ कोटी रुपये आणि
मुख्यालयात – १.०४ लाख प्रकरणांमधून ७.५४ कोटी रुपये
