मुंबई : राष्ट्रवादी काँग्रेसचे ज्येष्ठ नेते छगन भुजबळ यांची नाराजी अजूनही कायम असल्याचे दिसते, आणि त्यांच्या कडून मोठ्या निर्णयाची तयारी सुरू आहे. भुजबळ यांनी पक्षातील तीन बड्या नेत्यांवर आरोपांची राळ उडवल्यानंतर, राष्ट्रवादीच्या कोणत्याही नेत्याने त्यांची समजूत घालण्याचा प्रयत्न केला नाही. त्यामुळे भुजबळ एकाकी पडल्याचे चित्र आहे. या पार्श्वभूमीवर भुजबळ उद्यापर्यंत मोठा निर्णय घेऊ शकतात, अशी शक्यता वर्तविण्यात येत आहे.
भुजबळ आज मुंबईत येणार आहेत. यावेळी ते दोन दिवस समर्थकांशी चर्चा करूनच निर्णय घेणार आहेत. यामुळे अजित पवार यांच्या नेतृत्वातील राष्ट्रवादीत मोठा राजकीय भूकंप होण्याची शक्यता वर्तविण्यात येत आहे.
छगन भुजबळ यांनी नाशिकमध्ये समता परिषदेच्या कार्यकर्त्यांशी संवाद साधताना अजित पवारांवर टीका केली होती. त्यांनी अजित पवार यांच्या एकाधिकारशाहीवर हल्ला चढवला आणि ते म्हणाले की, सुनील तटकरे आणि प्रफुल्ल पटेल यांना त्यांचे समर्थन मिळाले असले तरी पक्षाच्या इतर नेत्यांनी त्यांना भेटायला येऊन समजूत घालण्याचा प्रयत्न केला नाही. यामुळे भुजबळ अधिक अस्वस्थ झाल्याचे सांगितले जात आहे.
भुजबळ यांनी अजित पवार यांच्यापासून वेगळं होण्याचा निर्णय घेतल्यास, त्यांच्यासमोर तीन पर्याय आहेत. यात शरद पवार गटात प्रवेश, भाजपमध्ये प्रवेश आणि ओबीसींचं देशव्यापी संघटन उभं करणं यांचा समावेश आहे. यामुळे भुजबळ कोणता पर्याय निवडतात, हे राजकीय वर्तुळात चर्चेचा विषय बनला आहे.
यासोबतच, शरद पवार गटाचे खासदार निलेश लंके यांनी भुजबळ यांना शरद पवार गटात येण्याचे आवाहन केले आहे. लंके यांनी म्हटले की, भुजबळ हे तळागाळातून आलेले नेतृत्व आहेत आणि त्यांच्यावर जे अन्याय झाले आहेत, त्याची त्यांनी निंदा केली. भुजबळ जर शरद पवार गटात आले, तर त्यांचे स्वागत केले जाईल, अशी प्रतिक्रिया त्यांनी दिली आहे.
या सर्व घडामोडींच्या पार्श्वभूमीवर, छगन भुजबळ यांचा पुढील निर्णय महाराष्ट्रातील राजकारणावर मोठा परिणाम करु शकतो.
