वृक्षतोड करताय? तर तुम्हाला होणार तब्बल ‘इतका’ दंड

तरुण भारत लाईव्ह ।२१ फेब्रुवारी २०२३। जळगाव शहरामध्ये विनापरवानगी वृक्षतोडीचे प्रकार सुरु आहेत. तुम्ही जर झाड तोडत असताना पकडले गेलात तर तुम्हाला थेट १० हजारांपर्यंत दंड होऊ शकतो

याचबरोबर दंडाची रक्कम न भरल्यास संबंधितांविरुद्ध फौजदारी गुन्हा दाखल केला जाऊ शकतो. याशिवाय एक वृक्ष तोडण्याची परवानगी घेतली असल्यास त्या वृक्षाच्या बदल्यात ५ वृक्ष लावणे बंधनकारक केले आहे. त्यासाठी १५०० रुपये डिपॉझिट आकारण्याचा महत्त्वपूर्ण निर्णय महापालिकेकडून घेण्यात आला आहे.

महापालिका प्रशासनाच्या नियमानुसार अनधिकृतपणे किंवा विना परवानगीने वृक्षतोड केल्यास दहा हजारांचा दंड व फांद्या तोडल्यास पाच हजार रुपये दंड करण्याचा निर्णय घेण्यात आला आहे. या निर्णयाची सर्व शाखा अभियंता यांनी अंमलबजावणी करण्याचे आदेश शहर अभियंत्यांकडून देण्यात आलेले आहेत.