धुळे जिल्ह्यातील साक्री शिवारातील मलांजन येथील शेतातून शक्तिमान कंपनीचे रोटाव्हेटर चोरट्यांनी लांबविल्या प्रकरणी साक्री पोलीस ठाण्यात गुन्हा दाखल करण्यात आला होता. गुन्हे शाखेने गोपनीय माहितीच्या आधारे दोन अट्टल चोरट्यांना अटक करीत शेती साहित्यासह गावठी कट्टा व जिवंत काडतूस जप्त केले. सुरेश ऊर्फ सुन्ऱ्या रमेश गावित (३४. रा. सावरट, कोळदा, ता. नवापूर, जि. नंदुरबार) व प्रभू होड्या गावित (३१, रा. उचीशेवडी, ता. नवापूर) अशी अटकेतील संशयितांची नावे आहेत.
मलांजन (ता. साक्री) शिवारातून रोटाव्हेटर चोरी प्रकरणी गुन्हा दाखल झाल्यानंतर धुळे गुन्हे शाखेचे वरिष्ठ पोलीस निरीक्षक श्रीराम पवार यांना चोरट्यांबाबत माहिती मिळाल्यानंतर त्यांनी पथकाला कारवाईचे निर्देश दिले. पेरेजपूर (ता. साक्री) शिवारातून नाल्याजवळून संशयितांना ताब्यात घेतल्यानंतर त्यांनी चोरीची कबुली देत ३० हजारांचे पिस्तूल, एक हजाराचे काडतूस, पाच लाखांचे पासिंग नंबर नसलेले कोरे ट्रॅक्टर, एक लाखाचे रोटाव्हेटर, एक लाखाची बुलेट, ८० हजारांची दुचाकी, असा सुमारे आठ लाख ११ हजारांचा म द्देमाल जप्त केला. संशयित सुरेश व प्रभू हे अट्टल गुन्हगार असून, त्यांच्याविरुद्ध साक्री, निजामपूर, पिंपळनेर, जायखेडा नाशिक ग्रामीण, विसरवाडी येथील पोलिसांत दहा गुन्हे दाखल आहेत.
ही कारवाई धुळे पोलीस अधीक्षक श्रीकांत धिवरे, अपर पोलीस अधीक्षक किशोर काळे यांच्या मार्गदर्शनात धुळे स्थानिक गुन्हे शाखेचे वरिष्ठ पोलीस निरीक्षक श्रीराम पवार, साहाय्यक निरीक्षक जयेश खलाणे, अमित माळी, संजय पाटील, रामलाल अहिरे, सदेसिंग चव्हाण, संतोष हिरे, तुषार सूर्यवंशी, देवेंद्र ठाकूर, शिंदे, सुनील पाटील, अमोल जाधव, राजीव गिते, मयूर चौधरी, नारायण चव्हाण आदींच्या पथकाने केली.
