---Advertisement---
राज्यात २०२४ च्या विधानसभा निवडणुकीच्या पार्श्वभूमीवर सुरू करण्यात आलेल्या मुख्यमंत्री लाडकी बहीण योजनेअंतर्गत पात्र महिलांच्या खात्यात दर महिन्याला १५०० रुपये जमा केले जात आहेत. नोव्हेंबर महिन्याचा हप्ता काही दिवसांपूर्वी जमा झाला असला, तरी डिसेंबर महिना संपून जानेवारीचा पहिला आठवडा उलटूनही पुढील हप्ता अद्याप खात्यात आलेला नाही. त्यामुळे अनेक महिलांमध्ये संभ्रम निर्माण झाला आहे.
दरम्यान, राज्यात स्थानिक स्वराज्य संस्थांच्या निवडणुका सुरू असल्याने या निवडणुकांनंतर लाडकी बहीण योजनेचा लाभ बंद होईल, असे दावे विरोधकांकडून करण्यात येत आहेत. या आरोपांवर आता उपमुख्यमंत्री एकनाथ शिंदे यांनी स्पष्ट भूमिका मांडली आहे.
एकनाथ शिंदेंचे स्पष्टीकरण
लाडकी बहीण योजना बंद होणार असल्याच्या चर्चांवर बोलताना एकनाथ शिंदे यांनी महिलांना ठाम शब्दांत दिलासा दिला. लाडक्या बहिणींनी विधानसभा निवडणुकीत सरकारला मोठा पाठिंबा दिल्याचे त्यांनी सांगितले. “मी स्वतः गरिबी अनुभवली आहे, संघर्ष पाहिला आहे. अनेकांनी ही योजना बंद करण्यासाठी न्यायालयात धाव घेतली, मात्र लाडक्या बहिणींनी अशा प्रयत्नांना योग्य उत्तर दिले आहे. ही योजना कोणीही बंद करू शकत नाही,” असे त्यांनी ठामपणे सांगितले.
देवेंद्र फडणवीसांचे महत्त्वाचे आवाहन
निवडणूक प्रचारादरम्यान उपमुख्यमंत्री देवेंद्र फडणवीस यांनीही लाडक्या बहिणींविषयी महत्त्वाची घोषणा केली आहे. राज्यातील सुमारे ५० लाख महिलांना ‘लखपती दीदी’ बनवण्याचा सरकारचा मानस असल्याचे त्यांनी सांगितले. या उपक्रमाच्या माध्यमातून महिलांना स्वयंरोजगाराच्या संधी उपलब्ध करून देण्यात येणार असून आर्थिकदृष्ट्या सक्षम करण्यावर भर दिला जाणार आहे.
