वाढीव वीज बिलाविरोधात एरंडोलकर नागरिकांमध्ये संताप

एरंडोल : शहरातील वीज ग्राहकांना मागील काही महिन्यांपासून वाढीव बिलाच्या समस्येला सामोरे जावे लागत आहे. वीज वापर करण्यात कोणतीही वाढ झालेली नसतांना घरगुती वीज बिलांमध्ये अचानकपणे वाढ झाली आहे. मोठ्या प्रमाणांत वाढ झाल्याने वीज ग्राहकांनी नाराजी व्यक्त केली आहे. दरम्यान, विद्युत वितरण कंपनी एरंडोल विभागाचे कार्यकारी अभियंता यांच्याकडे आपली तक्रार मांडत वीज बिल कमी करण्यात यावेत अशी मागणीचे निवेदनाद्वारे केली आहे.

नागरिकांनी दिलेल्या निवेदनानुसार, एरंडोलकरांना येत असलेली वाढीव बिलांची समस्या सामान्य नागरिकांवर मोठा आर्थिक भार टाकत आहे. वेळेवर बिल भरूनही अशा प्रकारे अवाजवी रक्कम येणे अन्यायकारक असल्याचे नागरिकांचे म्हणणे आहे. या वाढीव बिलांसंदर्भात नागरिकांनी महावितरणकड प्रमुख मागण्या केल्या आहेत. अवाजवी वाढीव आलेल्या वीज बिलांची तपासणी करून ती रक्कम वाजवी दरात कमी करावी.

संबंधित मीटरची फेरतपासणी करण्यात यावी. ग्राहकांसाठी सुलभ बिल दुरुस्ती प्रक्रिया त्वरित सुरू करावी. नागरिकांच्या समस्यांचे निवारण करून या संदर्भात तात्काळ लेखी उत्तर देण्यात यावे. या निवेदनावर शहरातील अनेक नागरिकांच्या सह्या आहेत, जे या समस्येने त्रस्त आहेत. जर या मागण्यांकडे दुर्लक्ष झाल्यास, नागरिकांनी आंदोलनाचा पवित्रा घेण्याचा इशारा दिला आहे. निवेदनावर नागरिकांच्या सह्या आहेत.