संभल : उत्तरप्रदेशातील बहुचर्चित संभलच्या चंदौसी परिसरातील प्राचीन पायरी विहिरीचे सुरू असलेले खोदकाम बंद करण्यात आले. ही विहिर प्राचीन आहे, त्यामुळे काही भाग केव्हाही कोसळू शकतो, असा इशारा देत खोदकाम करणाऱ्या मजुरांना उत्खनन केलेल्या जागेतून बाहेर येण्यास भारतीय पुरातत्त्व सर्वेक्षण विभागाच्या (एएसआय) अधिकाऱ्यांनी सांगितले. एएसआय अधिकारी राजेश कुमार मीना यांनी उत्खननाची पाहणी केली. ते म्हणाले की, विहीर असलेल्या पायरीच्या आतील भिंती खूप कमकुवत झाल्या आहेत. कोणत्याही क्षणी त्या कोसळण्याची भीती आहे. त्यामुळे कामगारांना दुसऱ्या मजल्यावर खोदकामासाठी जाण्यास मनाई करण्यात आली. उत्खननाचा गुरुवारी १४वा दिवस होता.
वाळू सरकत होती
दुसऱ्या मजल्यावर वाळू खाली सरकत होती. त्यामुळे आज उत्खनन काम बंद करण्यात आले. भिंती तुटत आहेत, खाली ऑक्सिजनची कमतरता आहे. आत गेल्यास उष्मा होतो, त्यामुळे अपघात होऊ शकतो. परिस्थिती पाहता प्राचीन विहिरीच्या आत जाणे धोकादायक आहे, असेही एएसआयने स्पष्ट केले.
काम करणे खूप आव्हानात्मक
बुधवारी ऐतिहासिक पायरी विहिरीच्या दुसऱ्या मजल्याचा दरवाजा २५ फूट असल्याचे उघड झाले. यासोबतच एएसआय टीमने सर्वेक्षण केले असता बांधकामाच्या भिंती कमकुवत झाल्याचे दिसले. कोणत्याही क्षणी या भिंती कोसळू शकतात, असा इशारा देण्यात आला. ऑक्सिजनच्या कमतरतेबरोबरच उत्खनन केलेल्या परिसरात उष्णता जाणवत आहे. अशा परिस्थितीत काम करणे खूप आव्हानात्मक बनले असल्याचे एएसआयने स्पष्ट केले.
