मुंबई : देवेंद्र फडणवीस हे थोड्याच वेळात महाराष्ट्राच्या मुख्यमंत्रीपदाची तिसऱ्यांदा शपथ घेणार आहेत. आझाद मैदानावर आयोजित करण्यात आलेल्या या शपथविधी सोहळ्याला पंतप्रधान नरेंद्र मोदी आणि गृहमंत्री अमित शहा यांच्यासह अनेक मान्यवर उपस्थित राहणार आहेत. यांच्यासोबतच चित्रपट, उद्योग आणि क्रीडा क्षेत्रातील अनेक मान्यवरांची उपस्थिती असेल. तसेच नीता अंबानींसोबतच शाहरुख खान आणि सलमान खानही शपथविधीला
आझाद मैदानावर होणाऱ्या शपथविधी सोहळ्याला ४२ हजारांहून अधिक लोक उपस्थित राहण्याची शक्यता आहे. पंतप्रधान नरेंद्र मोदी आणि गृहमंत्री अमित शहा यांच्यासह किमान 10 केंद्रीय मंत्रीही या सोहळ्याला उपस्थित राहणार आहेत. याशिवाय 19 राज्यांचे मुख्यमंत्री आणि उपमुख्यमंत्रीही उपस्थित राहणार आहेत. फडणवीस आज सायंकाळी 5.30 वाजता तिसऱ्यांदा मुख्यमंत्रिपदाची शपथ घेणार आहेत. त्यांच्यासोबत दोन उपमुख्यमंत्रीही मंत्रिपदाची शपथ घेणार आहेत.
उद्योगपती मुकेश अंबानी, नीता अंबानी आणि राधिका अंबानी यांच्याशिवाय अनंत अंबानी, प्रणय अदानी हे देखील शपथविधीला उपस्थित असतील. अंबानी कुटुंबाव्यतिरिक्त नोएल टाटा, दीपक पारिख, कुमार मंगलम बिर्ला, अजय पिरामल, उदय कोटक, मानसी किर्लोस्कर, गीतांजली किर्लोस्कर यांचा या सोहळ्यात सहभाग असेल.
या शपथविधी सोहळ्याला चित्रपट जगताशी निगडित अनेक प्रसिद्ध चेहरेही उपस्थित राहणार आहेत. सलमान खान, शाहरुख खान, माधुरी दीक्षित, खुशी कपूर, विकी कौशल, रूपा गांगुली, रणबीर कपूर, सिद्धार्थ रॉय, आणि रणवीर सिंग हे देखील शपथविधी सोहळ्याला उपस्थित असतील. याशिवाय चित्रपट दिग्दर्शक रोहित शेट्टी, बोनी कपूर आणि एकता कपूर यांच्यासह श्रद्धा कपूर, जय कोटेक, विक्रांत मॅसी आणि जयेश शाह यांचाही समावेश असेल.
भारतरत्न आणि माजी क्रिकेटपटू सचिन तेंडुलकर पत्नी अंजली तेंडुलकरसह या सोहळ्याला उपस्थित राहणार आहेत. याशिवाय बिरेंद्र सराफ आणि अनिल काकोडकर हे देखील या सोहळ्याचा भाग असणार आहेत.
