तरुण भारत लाईव्ह । १७ मार्च २०२३ । मुंबई पुणे एक्सप्रेसवर भीषण अपघात झाल्याची बातमी समोर आली आहे. कारने मागून ट्रकला धडक दिल्यामुळे हा भीषण अपघात झाला. या अपघातात ३ जणांचा जागीच मृत्यू झाल्याची घटना घडली आहे. ही कार मुंबईवरून पुण्याकडे जात होती.
सूत्राने दिलेल्या माहितीनुसार, पुणे मुंबई द्रुतगतीमार्गावर किलोमीटर 82.00 दरम्यान, उर्से टोलनाक्याजवळ सकाळी 7.45 च्या सुमारास हा अपघात झाला आहे. या ट्रकचा काही बिघाड झाल्यामुळे तो रस्त्यालगत उभा करण्यात आला होता. त्याचवेळी भरधाव येणाऱ्या कारने या ट्रकला धडक दिली आणि हा भीषण अपघात झाला. या भीषण अपघातात 3 जणांचा मृत्यू झाला.
विजय विश्वनाथ खैर, रा.सातारा असं मृत्युमुखी पडलेल्या व्यक्तीचे नाव असून इतर दोन जणांची ओळख पटवणे सुरू आहे. दरम्यान, पोलिसांनी तिघांचे मृतदेह ताब्यात घेतले असून शवविच्छेदनासाठी पाठवण्यात आले आहेत. अपघातानंतर महामार्गावर वाहनांच्या लांब रांगा लागल्या आहेत.
