---Advertisement---
शहरातील पिंप्राळा हुडको परिसरात राहणाऱ्या किरण अर्जुन सोये (वय ३१) या तरुणावर टोळक्याने लाकडी दांडक्यासह धारदार वस्तूने वार करून गंभीर जखमी केले. ही घटना दि. १० रोजी दुपारी २ वाजेच्या सुमारास घडली. याप्रकरणी रामानंद नगर पोलिसात चौघांविरुद्ध गुन्हा दाखल करण्यात आला आहे.
शहरातील पिंप्राळा हुडको परिसरात किरण सोये हा तरुण वास्तव्यास आहे. दि. १० रोजी दुपारच्या सुमारास त्या परिसरात राहणाऱ्या अभिमान भालेराव, विशाल भालेराव, बेबाबाई भालेराव, रेखा भालेराव यांनी किरण सोये यांना लाकडी दांडक्यासह धारदार वस्तूने वार करुन गंभीर जखमी केले.
तसेच दुपारच्या सुमारास घराबाहेर आल्यानंतर अभिमान भालेराव याने किरण सोये यांच्या डोक्यात लोखंडी सळई टाकून गंभीर जखमी केले. दरम्यान, सोये यांनी लागलीच रामानंद नगर पोलिसात फिर्यादीत दिली त्यानुसार अभिमान अवचित भालेराव, विशाल अभिमान भालेराव, बेबाबाई अभिमान भालेराव व रेखा भालेराव (सर्व रा. पिंप्राळा हुडको) यांच्याविरुद्ध गुन्हा दाखल करण्यात आला आहे. तपास पोहेकॉ इरफान मलिक हे करीत आहे.
रामानंदनगर पोलिसांकडून तिघांना अटक
शहरातील पिंप्राळा हुडको परिसरात राहणारे बेबाबाई भालेराव यांना त्या परिसरात राहणाऱ्यांनी आमच्याविरुद्ध पोलिसात तक्रार का केली म्हणत वाद घातला. त्यांच्यातील वाद वाढतच गेल्याने संशयित किरण सोये, अमोल सोये याच्यासह इतर दोघांनी बेबाबाई यांना शिवीगाळ करीत मारहाण केली. यावेळी अमोल सोये यांनी त्यांच्यावर धारदार कोयत्याने वार करीत गंभीर जखमी केले.
दरम्यान, त्यांनी रामानंद नगर पोलिसात तक्रार दिली असून त्यानुसार किरण अर्जुन सोये, अमोल अर्जुन सोये यांच्यासह इतर दोन अशा चार जणांविरुद्ध गुन्हा दाखल करण्यात आला आहे. यातील तीन संशयितांना अटक करण्यात आली आहे. तपास पोहेकॉ योगेश माळी हे करीत आहे.
