माजी नगरसेवक बंटी जोशींची गळफास घेत आत्महत्या, रुग्णालयात लोकप्रतिनिधींची गर्दी, नातेवाइकांचा आक्रोश

शहरातील माजी नगरसेवक अनंत ऊर्फ बंटी जोशी (वय ४८) यांनी शुक्रवारी (१ ऑगस्ट) सायंकाळी राहत्या घरात गळफास घेऊन आत्महत्या केल्याची हृदयद्रावक घटना घडली. जयनगर परिसरातील त्यांच्या निवासस्थानी सायंकाळी साडेसातच्या सुमारास ही घटना उघडकीस आली.

नातेवाइकांनी तातडीने बंटी जोशी यांना जिल्हा रुग्णालयात दाखल केले. मात्र, डॉक्टरांनी त्यांना तपासणीअंती मृत घोषित केले. बंटी जोशी हे महापालिकेत अभ्यासू आणि कार्यक्षम नगरसेवक म्हणून ओळखले जायचे. त्यांचे हसतमुख आणि सर्वांशी मैत्रिपूर्ण वागणे यांमुळे ते समाजात लोकप्रिय होते.

त्यांच्या अकाली निधनाच्या बातमीने मित्रपरिवार, नातेवाईक आणि समाजातील विविध स्तरांतील मान्यवरांनी रुग्णालयात धाव घेतली. या वेळी आमदार सुरेश भोळे, माजी महापौर नितीन लड्डा, सुनील महाजन, विष्णू भंगाळे, अरविंद देशमुख, शरद तायडे, सुनील झंवर, श्यामकांत सोनवणे, पीयूष कोल्हे, सरिता माळी-कोल्हे, कैलास सोनवणे, कुंदन काळे, गणेश सोनवणे, प्रशांत नाईक, रिंकू चौधरी, प्रशांत सुरळकर, अॅड. जमिल देशपांडे, अॅड. आनंद मुजुमदार यांच्यासह अनेकांनी रुग्णालयात धाव घेतली. घटनेचे नेमके कारण अद्याप समोर आलेले नाही. पोलिसांनी या प्रकरणाचा तपास सुरू केला आहे. बंटी जोशी यांच्या निधनाने जळगाव शहरात शोककळा पसरली आहे.