Horrific accident in Akkalkuwa taluka: Four children killed as vehicle overturns अक्कलकुवा : अवैध वाहतूक करणार्या प्रवासी वाहनाला झालेल्या भीषण अपघातात चार बालक ठार झाल्याची घटना अक्कलकुवा तालुक्यातील सातपुड्याच्या पायथ्याशी असलेल्या भराडीपादर गावाजवळ सोमवारी रात्री घडली. या अपघातात 40 हून अधिक प्रवासी जखमी झाल्याचे सांगण्यात आले. रात्री उशिरा दुर्गम भागात मदत पोहोचल्यानंतर माहिती समोर आली आहे. दरम्यान, या घटनेनंतर पुन्हा सातपुड्यातील अवैध वाहतुकीचा प्रश्न समोर आला असून पोलिस व आरटीओ प्रशासनाच्या अर्थपूर्ण चुप्पीबाबत संताप व्यक्त होत आहे.
नाल्यात कोसळले वाहन
सूत्रांच्या माहितीनुसार, सोमवारी सायंकाळी अक्कलकुवा येथून कटासखाई परीसरातील प्रवासी घेऊन क्रुझर (जी.जे.16 झेड.5201) ही क्षमतेपेक्षा अधिक प्रवासी घेवून भरधाव वेगाने निघाल्यानंतर भराडीपादर गावाजवळ चढावावर चालकाचा ताबा सुटल्याने वाहन थेट नाल्यात कोसळले. या अपघातात दिनेश हत्या वसावे (10) विलास रमेश पाडवी (13) विलास राजा वसावे (14, तीन्ही रा.कटासखाई) व दिनेश बाजा वसावे (रा.कोटली) हे ठार झाले. रात्री मिळेल त्या वाहनांनी जखमींना अक्कलकुवा ग्रामीण रुग्णालयात दाखल करण्यात आले तर गंभीर जखमींना नंदुरबार जिल्हा रुग्णालयात हलवण्यात आले.
