---Advertisement---
Jalgaon Gold Rate : सोने-चांदीच्या भावात सलग पाचव्या दिवशी भाववाढ होऊन चांदीच्या भावात सात हजार ७०० रुपयांची वाढ झाली. त्यामुळे चांदी एक लाख ७४ हजार रुपयांवर पोहोचली. तसेच सोन्याच्या भावात एक हजार ४०० रुपयांची वाढ होऊन ते एक लाख २८ हजार २०० रुपयांवर पोहोचले.
मध्यंतरी घसरण झालेल्या सोने-चांदीच्या भावात दोन आठवड्यांपासून चढ-उतार सुरू होता. त्यानंतर आता पाच दिवसांपासून तर मोठी भाववाढ सुरू आहे. यामध्ये २५ ते २८ नोव्हेंबर या चार दिवसांत ११ हजार ३०० रुपयांची वाढ होऊन एक लाख ६६ हजार ३०० रुपयांवर पोहोचली होती. त्यानंतर सलग दुसऱ्या दिवशी, शनिवारी (२९ नोव्हेंबर) एकाच दिवसात चांदीच्या भावात थेट सात हजार ७०० रुपयांची वाढ झाली. त्यामुळे चांदी एक लाख ७४ हजार रुपये प्रतिकिलोवर पोहोचली.
दुसरीकडे २५ ते २८ नोव्हेंबर या चार दिवसांत तीन हजार ८०० रुपयांची वाढ होऊन एक लाख २६ हजार ८०० रुपयांवर पोहोचलेल्या सोन्याच्या भावात २९ नोव्हेंबर रोजी पुन्हा एक हजार ४०० रुपयांची वाढ होऊन ते एक लाख २८ हजार २०० रुपये प्रतितोळ्यावर पोहोचले.
मागणी वाढली
आंतरराष्ट्रीय पातळीवर सोने-चांदीला पुन्हा मागणी वाढण्यासह भारतातही लग्नसराईमुळे मागणी वाढली आहे. त्यामुळे सोने-चांदीच्या भावात पुन्हा वाढ होत असल्याचे सुवर्ण व्यावसायिकांनी सांगितले.
