तरुण भारत लाईव्ह न्यूज । २८ डिसेंबर २०२२ । धुळे शहरानजीक मुंबई-आग्रा महार्गावर वरखेडी रोडवर दगडी कोळशाने भरलेल्या ट्रकला अचानक आग लागली. ही घटना मंगळवारी सकाळी १०.३० वाजेच्या सुमारास घडली. अग्निशमन दलाच्या जवानांनी तत्काळ घटनास्थळी धाव घेत आगीवर नियंत्रण मिळविले. मात्र, या ट्रकची काही टायर्स, बॉडी, कॅबीनमधील सीट जळून खाक झाले. अग्नीशमन दलामुळे पुढील अनर्थ मात्र टळला.
सूत्रानुसार, धुळे शहरानजीक मुंबई-आग्रा महार्गावर वरखेडी, कचरा डेपोपुढे कर्नाटक राज्याकडून गुजरात राज्यातील कच्छकडे चालक हितेश कुमार हा ट्रक (क्र. जी.जे.12/बी.वाय. 9394) ने जात होता. मात्र वरखेडी रोडवरील कचरा डेपोजवळ मंगळवारी सकाळी १०.३० वाजेच्या सुमारास ट्रकचे अचानक टायर फुटल्याने ट्रकला आग लागली. ठिणगीचे रूपांतर भीषण आगीत झाले. या आगीत ट्रकमधील दगडी कोळशाने पेट घेतला.
