धुळे जिल्ह्यात स्वतंत्र कृषी विद्यापीठ होणार स्थापन , कृषी मंत्र्यांचा सकारात्मक प्रतिसाद

धुळे : धुळे जिल्ह्यात स्वतंत्र कृषी विद्यापीठ स्थापन करण्यास राज्याचे कृषिमंत्री माणिकराव कोकाटे यांनी सकारात्मक प्रतिसाद दिला आहे. धुळे जिल्ह्यात कृषी विद्यापीठ स्थापन करावे अशी मागणी खासदार डॉ. शोभा बच्छाव यांनी केली होती. या मागणीला कृषिमंत्र्यांनी प्रतिसाद देत आवश्यक ती कार्यवाही करून धुळ्यात कृषी विद्यापीठ स्थापन करण्याचे आश्वासन दिले आहे.

महात्मा फुले कृषी विद्यापीठ, राहुरी संलग्न कृषी महाविद्यालय धुळे शहरात कार्यरत आहे. हे महाविद्यालय धुळे, नाशिक, जळगाव आणि नंदुरबार जिल्ह्यांसाठी कृषी शिक्षण, संशोधन व तंत्रज्ञान सेवा पुरवीत असते या महाविद्यालयांत बी.एस्सी. (कृषी) आणि एम.एस्सी. (कृषी) अभ्यासक्रम चालविले जातात. राहुरी कृषी विद्यापीठाचा कार्यक्षेत्र फार मोठे असल्याने सर्व जिल्ह्यांवर प्रभावी देखरेख ठेवणे आणि कारभार सुरळीत चालवणे कुलगुरूंसाठी आव्हानात्मक ठरत आहे. त्यामुळे धुळे येथे स्वतंत्र कृषी विद्यापीठ झाल्यास प्रशासनिक सुलभता तर मिळेलच, शिवाय कृषी शिक्षण, संशोधन आणि विस्तार कार्यक्रमांनाही अधिक गती मिळेल.

उत्तर महाराष्ट्रात मोठ्या प्रमाणावरील वर्गाचा शेती शेती हा मुख्य व्यवसाय आहे. धुळे जिल्ह्यात आधुनिक कृषी तंत्रज्ञान, संशोधन व मार्गदर्शनाची सोय झाल्यास या शेतकऱ्यांना प्रत्यक्ष लाभ मिळण्यास मदत होईल. विशेष म्हणजे, धुळे जिल्ह्यात कृषी विद्यापीठ व्हावे, ही मागणी अनेक वर्षांपासून प्रलंबित आहे. नागरिकही या मागणीसाठी सातत्याने आंदोलने करत आहेत.

खासदार डॉ. शोभा बच्छाव यांनी कृषिमंत्री कोकाटे यांची भेट घेऊन सविस्तर निवेदन सादर करत सर्व बाबी स्पष्ट केल्या. त्यांनी धुळे जिल्ह्याच्या भौगोलिक, कृषी व शैक्षणिक महत्त्वाबाबत माहिती दिली. त्यांच्या सविस्तर मांडणीमुळे कृषिमंत्र्यांनी सकारात्मक प्रतिसाद देत लवकरच धुळ्यात स्वतंत्र कृषी विद्यापीठ स्थापन करण्यासाठी कार्यवाही केली जाईल, असे आश्वासन दिले.