भारत एक देश, एक राष्ट्र म्हणून जगला पाहिजे, सरसंघचालक डॉ. मोहनजी भागवत यांचे प्रतिपादन

अंदमान : स्वातंत्र्यवीर सावरकर यांचे चरित्र परिपूर्णतेने भरलेले आहे. त्यांच्याकडे सर्व काही, प्रत्येक प्रकारची प्रतिभा होती. त्यांचे वर्णन करण्यासाठी अनेक विशेषणे लागतात. सावरकर यांच्या प्रत्येक कविता त्यांच्या व्यक्तिमत्त्वाचा एक अद्वितीय पैलू प्रकट करतात. त्यांचे व्यक्तिमत्त्व सर्व गोष्टींनी परिपूर्ण आहे. ते जन्मजात प्रतिभाशाली होते, असे प्रतिपादन राष्ट्रीय स्वयंसेवक संघाचे सरसंघचालक डॉ. मोहनजी भागवत यांनी शुक्रवारी येथे केले.

सावरकर प्रतिभावान होते. गायन, लेखन, नाटक, कविता सर्व काही त्यांच्याकडे होते आणि हे सर्व देशासाठी होते. सावरकर हे त्यांच्या देशभक्तीसाठी लक्षात राहतात. येथे ‘तुमच्या तुकड्या’ची भाषा असू नये. संपूर्ण भारत एक देश, एक राष्ट्र म्हणून जगला पाहिजे. छोट्या छोट्या गोष्टींवरून फूट आणि संघर्ष होऊ नये. त्यांनी भाषेच्या परिपूर्णतसाठी काम केले, असे सरसंघचालक डॉ. मोहनजी भागवत यांनी सांगितले. स्वातंत्र्यवीर सावरकर यांच्या प्रतिमेचे अनावरण आणि ‘सागरा प्राण तळमळला’ या सांस्कृतिक कार्यक्रमात ते बोलत होते. यावेळी केंद्रीय गृहमंत्री अमित शाह उपस्थित होते.

सावरकर यांनी ज्या गोष्टींवर काम केले, ते आपल्या जीवनात प्रत्यक्षात आणण्यासाठी आपल्याला प्रयत्न करावे लागतील. सावरकर यांनी राष्ट्राचे स्पष्ट दर्शन दिले. त्यांनी त्याला हिंदू राष्ट्र म्हटले. त्यांनी हे देखील स्पष्ट केले आहे की, ‘भारताची भूमी ही सागरासारखी आहे. पूर्वजांची भूमी हिंदूंच्या पवित्र भूमीसारखी आहे, असे विचारही सरसंघचालकांनी मांडले. सावरकरांना गुलामगिरीत आणि स्वातंत्र्यादरम्यान दोन्ही त्रास सहन करावा लागला, परंतु त्यांनी कधीही देशाला दोष दिला नाही. दुर्लक्षित असूनही त्यांनी आपले जीवन देशासाठी समर्पित केले. १८५७ ते १९४७ पर्यंत देशाच्या स्वातंत्र्यासाठी प्रयत्न करणारे, आपले प्राण अर्पण करणारे सर्व स्वातंत्र्य सैनिक एका आकाशगंगेसारखे आहेत. त्या आकाशगंगेतील सर्वांत तेजस्वी तारा म्हणजे वीर सावरकर होय, असे डॉ. मोहनजी भागवत यांनी नमूद केले.

सावरकरांनी कठीण दिवस येथे घालविले : अमित शाह

स्वातंत्र्यापूर्वी ज्यांना अंदमानात आणले जायचे, ते स्वतःहून परत येत नसत. त्यांचे कुटुंब त्यांना विसरत असत. त्या काळात कोणीही काळ्या पाण्याच्या शिक्षेतून परत येईल, अशी अपेक्षा करीत नव्हते. कोणी परतले तरी ते पूर्णपणे शारीरिक आणि मानसिकदृष्ट्या उद्ध्वस्त झालेले असायचे. परंतु आज हे ठिकाण तीर्थक्षेत्र बनले आहे: कारण वीर सावरकरांनी त्यांच्या आयुष्यातील कठीण दिवस येथे घालवले होते, असे केंद्रीय गृहमंत्री अमित शाह यांनी सांगितले.

अंदमान हे ठिकाण सुभाषचंद्र बोस यांच्या जीवनाशी देखील जोडलेले आहे. ही भारताची पहिली भूमी होती. जी त्यांनी मुक्त केली. त्यांनी या भूमीला शहीद आणि स्वराज असे नाव देण्याचा सल्ला दिला, ही संकल्पना पंतप्रधान नरेंद्र मोदी यांनी राबवली आहे. असे अमित शाह यांनी सांगितले. ‘सागरा प्राण तळमळला’ हे मातृभूमीच्या तळमळीतून लिहिलेले गाणे आहे. ते इंग्लंडच्या समुद्र किनान्यावर रचले गेले होते. या गाण्याची प्रत्येक ओळ आणि शब्द मातृभूमीवरील प्रेम प्रतिबिंबित करते. सावरकर लेखक आणि योद्धे होते, असेही ते म्हणाले.