गुंतवणूकदारांची लॉटरी! सिल्वर लाईन टेक्नॉलॉजीला तब्बल इतक्या कोटींचा बूस्ट

भारतीय आयटी क्षेत्रात काम करणारी सिल्व्हरलाइन टेक्नॉलॉजीज कंपनी सध्या नव्या घडामोडींमुळे चर्चेत आली आहे. संयुक्त अरब अमिरातीतील ट्रूलेजर टेक्नॉलॉजीज या कंपनीने सिल्व्हरलाइनमध्ये सुमारे 80 कोटी रुपयांची धोरणात्मक गुंतवणूक करण्याची तयारी दर्शवली आहे. या व्यवहारानंतर कंपनीचे एकूण मूल्यांकन अंदाजे 400 कोटी रुपयांपर्यंत पोहोचण्याची शक्यता आहे. एआय क्षेत्रातील प्रकल्पांना मिळालेला प्रतिसाद आणि वाढता व्यवसाय पाहता ही गुंतवणूक कंपनीसाठी महत्त्वाची मानली जात आहे.

या प्रस्तावावर अंतिम निर्णय घेण्यासाठी 18 फेब्रुवारी 2026 रोजी संचालक मंडळाची बैठक होणार आहे. ट्रूलेजर टेक्नॉलॉजीजला कंपनीत 20 टक्के हिस्सा घ्यायचा आहे. या भांडवलामुळे सिल्व्हरलाइनची आर्थिक स्थिती अधिक मजबूत होईल आणि तंत्रज्ञान विस्तारासाठी आवश्यक संसाधने उपलब्ध होतील. शेअर बाजारातही या घडामोडींचा सकारात्मक परिणाम दिसून आला. 13 फेब्रुवारी 2026 रोजी कंपनीचा शेअर 5 टक्क्यांनी वाढून 15.4 रुपयांवर व्यवहार करत होता.

दरम्यान, 2 फेब्रुवारी 2026 रोजी कंपनीने ‘SilverAI’ हा एआय-आधारित वेब प्लॅटफॉर्म सादर केला. लॉन्चनंतर केवळ आठवडाभरात 24 हजारांहून अधिक वापरकर्त्यांनी नोंदणी केली आहे. पुढील 45 दिवसांत ही संख्या 5 लाखांपर्यंत नेण्याचे उद्दिष्ट कंपनीने ठेवले आहे.

‘प्रो’ सबस्क्रिप्शनची किंमत प्रतिमहिना 9 डॉलर, म्हणजे सुमारे 750 रुपये निश्चित करण्यात आली आहे. जर 5 लाख वापरकर्त्यांनी सशुल्क सदस्यत्व स्वीकारले, तर वार्षिक महसूल 430 ते 450 कोटी रुपयांदरम्यान जाऊ शकतो, असा अंदाज व्यक्त केला जात आहे. 10 टक्के कन्व्हर्जन दर गृहित धरल्यास सुमारे 43 कोटी, तर 20 टक्के दर असल्यास 86 कोटी रुपयांपर्यंत महसूल मिळू शकतो.

वापरकर्त्यांचा प्रतिसाद वाढावा यासाठी कंपनीने ‘प्रो’ आवृत्ती पुढील सहा महिन्यांसाठी विनामूल्य उपलब्ध करून दिली आहे. भारतातील एआय चॅटबॉट बाजारपेठ 2031 पर्यंत 26.4 अब्ज डॉलर्सपर्यंत वाढेल, असा अंदाज वर्तवला जात आहे. या वाढीचा फायदा मिळवण्याच्या दृष्टीने सिल्व्हरलाइनची रणनीती आखली जात आहे.

आर्थिक कामगिरीकडे पाहिल्यास, चालू आर्थिक वर्षाच्या पहिल्या सहामाहीत कंपनीने 200.16 कोटी रुपयांचा महसूल नोंदवला आहे, तर निव्वळ नफा 18.41 कोटी रुपये झाला आहे. दुसऱ्या तिमाहीत महसुलात मागील वर्षाच्या तुलनेत शंभरपट वाढ झाल्याचे कंपनीने जाहीर केले आहे. 1992 मध्ये स्थापन झालेली सिल्व्हरलाइन टेक्नॉलॉजीज आता एआय आणि क्लाउड तंत्रज्ञानाच्या बळावर जागतिक बाजारपेठेत आपले स्थान मजबूत करण्याच्या दिशेने वाटचाल करत आहे.