IPL 2025: इंडियन प्रीमियर लीग (आयपीएल) 2025 हंगामाची सुरुवात कधी होणार याबाबत मोठे अपडेट समोर आले आहे. बीसीसीआयचे उपाध्यक्ष राजीव शुक्ला यांनी रविवारी (१२ जानेवारी) आयपीएल 2025 च्या हंगामाची सुरुवात कधी होणार आहे याची माहिती दिली. हा निर्णय बीसीसीआयच्या विशेष सर्वसाधारण सभेत (एजीएम) घेण्यात आला आहे.
आयपीएलच्या आगामी हंगामासाठी तयारी जोरात सुरु आहे. क्रिकेटप्रेमी या तारखेची आतुरतेने वाट पाहत होते. यातच बीसीसीआयचे उपाध्यक्ष राजीव शुक्ला यांनी आयपीएल 2025 चा हंगाम 23 मार्चपासून सुरू होणार असल्याची घोषणा केली आहे. तथापि, या हंगामातील पहिला सामना कोणत्या संघांमध्ये खेळवला जाईल, हे अद्याप निश्चित झालेले नाही.
राजीव शुक्ला यांनी प्रसारमाध्यमांशी संवाद साधताना सांगितले की, बीसीसीआयच्या बैठकीत मुख्यत: खजिनदार आणि सचिव निवडीसंबंधी चर्चा केली गेली आणि आयपीएल आयुक्तांची नियुक्ती एका वर्षासाठी करण्यात आली आहे.
दरम्यान, राजीव शुक्ला यांनी, महिला प्रीमियर लीग (WPL) 2025 संदर्भातील ठिकाणांची घोषणा लवकरच करण्यात येणार असल्याचे सांगितले. मागील सत्रात, 2024 आयपीएल हंगामाची सुरुवात 22 मार्च रोजी झाली होती, आणि त्यावेळी पहिला सामना RCB आणि CSK यांच्यात खेळला गेला होता. अंतिम सामना 26 मे रोजी KKR आणि हैदराबाद संघांमध्ये झाला होता, ज्यात KKR ने तिसऱ्यांदा चॅम्पियन बनण्याचा मान मिळवला.
2025 आयपीएलसाठी, अंतिम सामना केकेआरच्या होम ग्राउंड ईडन गार्डन्स स्टेडियमवर खेळला जाऊ शकतो, अशी शक्यता वर्तविण्यात येत आहे.
राजीव शुक्ला यांनी सांगितले की, निवड समितीची बैठक १८ किंवा १९ जानेवारीला होणार आहे, आणि त्यानंतरच भारतीय संघाची घोषणा केली जाईल. यामुळे क्रिकेटप्रेमींच्या अपेक्षांना काही प्रमाणात उत्तर मिळणार आहे.
