---Advertisement---
Jalgaon Crime : पकड वॉरंट बजावताना पोलिसांवर चाकूहल्ल्याचा प्रयत्न, तरुणास अटक जळगाव शहरात पकड वॉरंट बजावण्यासाठी गेलेल्या पोलिसांवर तरुणाने चाकू उगारून धक्काबुकी केल्याची खळबळजनक घटना घडली आहे. गुजराल पेट्रोल पंपाजवळील हॉटेल पूजा येथे ही घटना घडली असून आरोपीने पळ काढण्याचा प्रयत्न केला. मात्र, पोलिसांनी तत्काळ पाठलाग करून त्याला अटक केली.
न्यायालयीन पकड वॉरंट असलेला नितेश उर्फ गोल्या मिलिंद जाधव (रा. पिंप्राळा) हा संबंधित हॉटेलमध्ये असल्याची माहिती एलसीबीचे कॉन्स्टेबल महेश सोमवंशी यांना मिळाली. त्यानुसार सोमवंशी आणि उपनिरीक्षक शरद बागल यांनी हॉटेलमध्ये जाऊन नितेशला अटक करण्याचा प्रयत्न केला.
पोलिसांनी वॉरंटची माहिती देत सोबत येण्यास सांगितले असता नितेशने अरेरावी केली. त्याने उपनिरीक्षक बागल यांची कॉलर पकडून धक्काबुक्की केली तसेच कॉन्स्टेबल सोमवंशी यांच्यावर धारदार चाकूने हल्ला करण्याचा प्रयत्न केला. प्रसंगावधान राखत पोलिसांनी वार चुकवला, मात्र त्या गोंधळात आरोपीने पळ काढला.
यानंतर पोलिसांनी पाठलाग करून नितेशला ताब्यात घेतले. त्याला रामानंदनगर पोलिस ठाण्याच्या हवाली करण्यात आले असून पकड वॉरंटची अंमलबजावणी करण्यात आली आहे. आरोपीविरुद्ध शासकीय कामात अडथळा आणल्याप्रकरणी गुन्हा दाखल करण्यात आला असून या प्रकरणाचा तपास सहाय्यक निरीक्षक संदीप पाटील करीत आहेत.
