जळगाव ः भरधाव कार प्रवासी ॲपे रिक्षावर आदळून झालेल्या अपघातात महिला प्रवासी ठार झाली तर रिक्षातील चौघे गंभीर जखमी झाले. हा अपघात नशिराबाद गावाजवळील मुंजोबा मंदिराजवळील उड्डाणपुलावर बुधवारी सायंकाळी साडेसहा वाजेच्या सुमारास घडला. आस्माबी शेख मंजूर (30, रा.बोरखेडी, ता.मोताळा, जि.बुलढाणा) असे ठार विवाहितेचे नाव असून रिक्षातील चार प्रवासी गंभीर जखमी झाले आहेत.
रिक्षावर आदळली बलेनो जळगावकडून प्रवासी रिक्षा (एम.एच.19 बी.यू.5843) ही कलर व प्रवाशांना घेऊन भुसावळकडे बुधवारी सायंकाळी येत असताना पाठीमागून आलेली भरधाव कार (एम.एच.19 ई.ए.5109) ही रिक्षावर आदळली. या अपघातात रिक्षा काही अंतरावर फेकली जावून उलटी झाल्याने रिक्षातील प्रवासी महिला आस्माबी शेख मंजूर यांचा जागीच मृत्यू झाला तर रिक्षातील चौघे गंभीर जखमी झाले. हा अपघात नशिराबाद गावाजवळील मुंजोबा मंदिराजवळील उड्डाणपुलावर घडला जखमींना शासकीय वैद्यकीय महाविद्यालय व रुग्णालयात दाखल करण्यात आले. अपघाताची माहिती मिळताच नशिराबाद पोलिसांनी घटनास्थळी धाव घेतली.
अपघातात चौघे गंभीर
या अपघातात रिक्षातील जुबेर शेख मेहबुब शेख (40), करीम बेग शरीफ बेग (वय 29), शेख सादीक शेख इसार (40) व शेख उमेमा शेख जुबेर (6) हे चौघेजण गंभीर जखमी झाले. त्यांच्यावर गोदावरी हॉस्पिटलमध्ये उपचार सुरू आहेत.
