जळगाव : गेल्या आठ ते दहा दिवसांपासून आमच्याकडे का बघतोस, असा जाब विचारत तिघांनी चाकू हल्ला करून विद्यार्थ्याला जखमी केल्याची घटना सोमवार, 4 रोजी सायंकाळी मेहरूणमधील रामनगर रस्त्यावर घडली.
याप्रकरणी मंगळवार 5 रोजी जखमीच्या तक्रारीवरून आकीब पटेल तसेच त्याच्या दोन साथीदारांविरूध्द एमआयडीसी पोलीस ठाण्यात गुन्हा दाखल करण्यात आला.
19 वर्षीय विद्यार्थी शिक्षण घेत असून तो मेहरूण जवळील भिलाटी परिसरात कुटुंबासह वास्तव्यास आहे. मंगळवारी सायंकाळी रामनगरातील रस्त्यावरून हा विद्यार्थी जात असताना आकीब पटेल (पूर्ण नाव माहित नाही) तसेच त्याच्या दोन साथीदारांनी या विद्यार्थ्याला रोखले. आठ ते दहा दिवसांपासून तू आमच्याकडे का बघतो, असा सवाल करत चाकु सारख्या हत्याराने त्याच्यावर वार करत डोक्यावर,पाठीवर तसेच छातीवर गंभीर दुखापत केली. प्रत्यक्षदर्शीनी विद्यार्थ्याकडे धाव घेतली. तसेच त्याला तत्काळ उपचारासाठी रूग्णालयात हलविले. घटना कळताच सपोनि दयानंद सरपदे यांचे सह पोलिसांनी घटनास्थळी धाव घेतली. कुटुंबियांनी रूग्णालयात धाव घेत जखमीच्या प्रकृतीची माहिती घेतली. या प्रकरणी तक्रारीवरून आकीबसह त्याच्या दोघा साथीदारांविरूध्द गुन्हा दाखल करण्यात आला असून तपास हेकॉ संजय धनगर करीत आहेत.
