तरुण भारत लाईव्ह न्यूज । ९ डिसेंबर २०२२ । मनस्विनी सुभाष सोनवणे या तरुणीचा नुकताच अपघाती मृत्यू झाला. तिच्या प्रित्यर्थ शिव कॉलनी स्टॉप, जळगाव येथे गुरुवारी मेणबत्ती पेटवून श्रद्धांजली अर्पण करण्यात आली. यावेळी शालेय विद्यार्थी, महाविद्यालयीन तरुण-तरुणी व शहरातील विविध भागातील नागरिक उपस्थित होते.
स्व.मनस्विनी सुभाष सोनवणे (वय २१) ही शहरातील आयएमआर महाविद्यालयात बॅचलर ऑफ बिझिनेस ऍडमिनिस्ट्रेशन (बीबीए)च्या तृतीय वर्षाला नियमित शिक्षण घेत होती. त्यासोबतच ती सीए फाउंडेशनचा कोर्सही करत होती. दरम्यान,बीबीएच्या अभ्यासक्रमाच्या तृतीय वर्षाची परीक्षा देऊन घरी मनस्वीनी ही भावासह मोपेड दुचाकी (एमएच १९ सी ७१६९) वरून घरी जात होती.
यादरम्यान, राखेने भरलेला एमएच १९ सीवाय ३३११ या क्रमाकांच्या या डंपरने जळगावकडून धुळ्याकडे जात असताना महामार्गावरील शिव कॉलनी परिसरातील रेल्वे उड्डाणपूलावर भाऊ बहीण जात असलेल्या मोपेड दुचाकीला मागून जोरदार धडक दिली. यात दुचाकीवरील मनस्वी ही तरुणी रोडवर पडली, तिच्या डोक्यावरुन डंपरचे चाक गेल्याने तिचा जागीच मृत्यू झाला.
दरम्यान, तिच्या प्रित्यर्थ जळगाव शहरातील शिव कॉलनी स्टॉप येथे विद्यार्थ्यांच्या माध्यमातून मेणबत्ती पेटवून श्रद्धांजली अर्पण करण्यात आली.
