मुंबई,
सुख म्हणजे काय असतं’ मालिकेच्या सेटवर बिबट्यामुंबईत पाऊस कोसळत असतानाच एक धक्कादायक बातमी समोर आली आहे. गोरेगाव येथील फिल्म सिटीत मराठी मालिकेच्या सेटवर बिबट्या शिरल्याची घटना घडली असून याचा व्हिडीओ व्हायरल झाला आहे. प्राथमिक माहितीनुसार, मुंबईतील पश्चिम उपनगरात असलेल्या गोरेगाव येथील फिल्म सिटीमध्ये मराठी सीरियल सुख म्हणजे काय असतंच्या सेटवर बिबट्या शिरल्याने एकच खळबळ उडाली.
सेटवर उपस्थित असलेले सर्व कर्मचारी सैरावैरा पळू लागले. या घटनेमुळे कर्मचाऱ्यांमध्ये मोठी दहशत निर्माण झाली आहे जेव्हा बिबट्या सेटवर शिरला त्यावेळी सेटवर 200 हून अधिक लोक उपस्थित होते. जर बिबट्याने कुणावर हल्ला केला असता तर याला जबाबदार कोण? फिल्म सिटीत वारंवार बिबट्या शिरल्याच्या घटना समोर येत आहेत मात्र, सरकार काहीही सुरक्षेच्या उपाययोजना करत नाहीये.
सरकारने याकडे लक्ष दिले नाही तर हजारो मजदूर आणि कलाकारांकडून संप पुकारण्यात येईल. 17 जुलै रोजी सुद्धा फिल्म सिटीत बिबट्या शिरल्याची बातमी समोर आली होती. इतकेच नाही तर या बिबट्याचा व्हिडिओ सुद्धा व्हायरल झाला होता. एका हिंदी मालिकेच्या शूटिंग दरम्यान ही घटना घडली होती. मालिकेच्या सेटवर अचानक बिबट्या दिसल्याने एकच खळबळ उडाली होती. त्यानंतर आता पुन्हा एकदा फिल्म सिटीत बिबट्या शिरल्याने खळबळ उडाली आहे.
