प्रयागराज : पंतप्रधान नरेंद्र मोदी यांच्या हस्ते शुक्रवारी प्रयागराज येथे गंगा पूजन करून महाकुंभाचे औपचारिक उद्घाटन करण्यात आले. यावेळी त्यांच्या हस्ते ५,५०० कोटी रुपयांच्या विविध विकास कामांचे लोकार्पण करण्यात आले. महाकुंभ मेळ्यातील १६७ विकास प्रकल्पांचे उद्घाटन तसेच अक्षयवत, हनुमान मंदिर, सरस्वती विहीर, भारद्वाज आश्रम आणि श्रृंगवरपूर धाम कॉरिडॉरचे उद्घाटनदेखील पंतप्रधान मोदी यांच्या हस्ते झाले.
पंतप्रधान म्हणाले, महाकुंभ हे आपल्या देशाच्या हजारो वर्षांपूर्वी चालत आलेल्या सांस्कृतिक आणि आध्यात्मिक प्रवासाचे जिवंत प्रतीक आहे. कुंभ हे कोणत्याही बाह्य प्रणालीपेक्षा मनुष्याच्या आंतरिक चेतनेचे नाव आहे. ही जाणीव आपोआप जागृत होते. ही जाणीव भारताच्या कानाकोपऱ्यातून लोकांना संगमाच्या काठावर खेचते. त्यामुळे हा महाकुंभ म्हणजे एकतेचा महायज्ञ असल्याचे मी पुन्हा एकदा सांगतो. यात प्रत्येक प्रकारच्या भेदभावांचा त्याग केला जातो.
वेदांच्या श्लोकांमध्ये ‘प्रयागराज’ची स्तुती
पंतप्रधान म्हणाले, हा केवळ तीन पवित्र नद्यांचा संगम नाही. प्रयागबद्दल असे म्हटले आहे की, सूर्य जेव्हा मकर राशीत प्रवेश करतो, तेव्हा सर्व दैवी शक्ती, सर्व तीर्थयात्री, सर्व ऋषी, महान ऋषी प्रयागात येतात. हे असे स्थान आहे, जिच्या प्रभावाशिवाय पुराण पूर्ण झाले नसते. प्रयागराज हे असे स्थान आहे, ज्याची वेदांच्या श्लोकांमध्ये स्तुती करण्यात आली आहे. आपला भारत हा पवित्र स्थळे आणि तीर्थक्षेत्रांचा देश आहे. गंगा, यमुना, सरस्वती, कावेरी, नर्मदा अशा असंख्य पवित्र नद्यांचा देश आहे. या नद्यांच्या प्रवाहाचे पावित्र्य, या असंख्य तीर्थक्षेत्रांचे महत्त्व आणि महानता, त्यांचा संगम, त्यांचे संयोजन, त्यांचा प्रभाव, त्यांचे वैभव, हा प्रयाग आहे. प्रयाग म्हणजे जिथे प्रत्येक पायरीवर पवित्र स्थाने आहेत, जिथे प्रत्येक पायरीवर पुण्य क्षेत्र आहेत.
पंतप्रधान मोदी जगातील सर्वांत लोकप्रिय नेते आदित्यनाथ
मुख्यमंत्री योगी आदित्यनाथ यांनी उपस्थितांना संबोधित केले. योगी म्हणाले की, जगातील सर्वांत लोकप्रिय नेते नरेंद्र मोदी आहेत. गंगा, यमुना आणि सरस्वती या त्रिवेणीच्या पूजन विधिनंतर पंतप्रधान मोदींच्या आगमनाने महाकुंभाची सुरुवात झाल्याचे सांगितले.
