मुंबई । देवेंद्र फडणवीस यांनी मुख्यमंत्रीपदाची शपथ घेतली असून अजित पवार आणि एकनाथ शिंदे यांनी उपमुख्यमंत्री म्हणून शपथ घेतली आहे. त्यामुळे आता मंत्रिमंडळ विस्ताराकडे सर्वांचे लक्ष लागले आहे. देवेंद्र फडणवीस, एकनाथ शिंदे, आणि अजित पवार यांची तिन्ही पक्षांतून भूमिका निर्णायक ठरणार आहे.
१३ डिसेंबरला होणाऱ्या मंत्रिमंडळ शपथविधीमध्ये कोणाला कोणती महत्त्वाची खाती मिळतात आणि पक्षीय बलाबल कसे विभाजित होते, याबाबतची उत्सुकता अधिक आहे.
भाजप, शिवसेना शिंदे गट, आणि राष्ट्रवादी काँग्रेसच्या गटांमध्ये मंत्रिपदाचे वाटप हे त्यांच्या शक्तीप्रदर्शनानुसार होणार आहे. तसेच, मंत्रिमंडळात प्रादेशिक संतुलन, सामाजिक घटकांचे प्रतिनिधित्व, तसेच आगामी निवडणुकांचा विचार करून खातेवाटप होण्याची शक्यता आहे.
देवेंद्र फडणवीस यांनी मुख्यमंत्रीपदाची शपथ घेतल्यानंतर मंत्रिमंडळ विस्ताराबाबत स्पष्टता दिली आहे. त्यांनी सांगितले की, तिन्ही घटक पक्षांच्या सहकार्याने हा निर्णय घेतला जाईल आणि कोणताही वाद नाही. नागपूर अधिवेशनाच्या आधी मंत्रिमंडळाचा विस्तार निश्चित करण्यात येणार आहे.
शिवसेनेचे आमदार भरत गोगावले आणि संजय शिरसाट यांनी देखील या आठवड्यात मंत्रिमंडळ विस्तार होण्याचे संकेत दिले आहेत. यामुळे राज्यातील राजकीय हालचालींना गती मिळण्याची शक्यता आहे. मंत्रिमंडळ विस्तारात कोणकोणत्या नेत्यांचा समावेश होणार याकडे आता सर्वांचे लक्ष लागले आहे.
