भागलपूर : पंतप्रधान नरेंद्र मोदी आणि बिहारचे मुख्यमंत्री नितीश कुमार यांच्या नियोजित दौऱ्यापूर्वीच शहरात एक मोठी गुन्हेगारी घटना घडली आहे. रविवारी (२३ फेब्रुवारी) रात्री टीएनबी कॉलेजमध्ये तृतीय श्रेणी कर्मचारी प्रभु नारायण मंडल यांची गोळ्या झाडून हत्या करण्यात आली. या घटनेमुळे परिसरात मोठी खळबळ उडाली असून, पोलिसांकडून तपासाला वेग देण्यात आला आहे.
गोळीबार कसा घडला?
ही घटना रविवारी रात्री १० वाजताच्या सुमारास घडली. प्रत्यक्षदर्शी सत्यम कुमार यांनी दिलेल्या माहितीनुसार, भारत-पाकिस्तान क्रिकेट सामना संपल्यानंतर प्रभु नारायण मंडल आपल्या क्वार्टरमध्ये बसले होते. त्याच वेळी त्यांचा ओळखीचा संजीव झा तेथे पोहोचला. दोघांमध्ये काही क्षण चर्चा झाली आणि अचानक संजीव झाने पिस्तूल काढून प्रभु नारायण मंडल यांच्या छातीत गोळी झाडली. जखमी अवस्थेत असलेल्या प्रभु नारायण मंडल यांना तातडीने सदर रुग्णालयात नेण्यात आले, मात्र डॉक्टरांनी त्यांना मृत घोषित केले.
संजीव झा: पूर्वीही गुन्हेगारीत सामील
प्रभु नारायण मंडल यांचे नातेवाईक आणि परिसरातील लोक मोठ्या संख्येने रुग्णालयात जमा झाले. मृताच्या कुटुंबाने दिलेल्या माहितीनुसार, प्रभु नारायण मंडल हे जिल्हास्तरीय क्रिकेटपटू होते. त्यांनी एकेकाळी महेंद्रसिंग धोनीसोबत सद्भावना चषक क्रिकेट स्पर्धेतही खेळले होते.
मात्र, या हत्येचा संशयित आरोपी संजीव झा पूर्वीही गुन्हेगारी प्रकरणात अडकलेला आहे. आठ वर्षांपूर्वी त्याने अरुण मंडल नावाच्या व्यक्तीवर गोळीबार केला होता, त्यानंतर तो काही काळ तुरुंगात होता. विशेष म्हणजे, तो कायद्याचा विद्यार्थी असूनही त्याच्यावर गंभीर आरोप आहेत. काही दिवसांपूर्वी प्रभु नारायण मंडल आणि संजीव झा यांच्यात वाद झाला होता, त्यात प्रभु नारायण यांनी संजीवला मारहाण केली होती. त्याचाच बदला घेण्यासाठी संजीवने गोळीबार केला असावा, असा पोलिसांचा प्राथमिक अंदाज आहे.
पोलिसांचा शोध मोहीम सुरू
भागलपूर पोलिसांनी तातडीने या प्रकरणाचा तपास सुरू केला आहे. हत्येच्या घटनेनंतर संजीव झा फरार झाला असून, त्याच्या शोधासाठी पोलिसांनी अनेक ठिकाणी छापे टाकले आहेत. पोलिसांकडून मृताच्या मित्रांची चौकशी केली जात असून, हत्येमागील नेमके कारण शोधण्याचा प्रयत्न केला जात आहे.
पंतप्रधान नरेंद्र मोदी आणि मुख्यमंत्री नितीश कुमार यांच्या नियोजित दौऱ्याच्या पार्श्वभूमीवर भागलपूरमध्ये सुरक्षाव्यवस्था अधिक कडेकोट करण्यात आली आहे. मात्र, या हत्याकांडामुळे प्रशासनाची चिंता वाढली असून, गुन्हेगारी रोखण्यासाठी अधिक गस्त वाढवण्यात आली आहे.
