नंदुरबार : नंदुरबार तालुक्यातील घुली येथे चोरट्यांनी घरफोडी करताना १२ बोअरची बंदूक लांबवली होती. याप्रकरणी उपनगर पोलिसात गुन्हा दाखल करण्यात आला होता. गुन्हे शाखेने या गुन्ह्याची उकल करीत अट्टल घरफोड्यांना अटक करीत चोरी केलेल्या १२ बोअरच्या बंदुकीसह ८० हजारांचा मुद्देमाल जप्त केला. शरद उर्फ पवन अरुण चव्हाण (२३. एकता नगर, नंदुरबार) व सनी विजय शिंदे (१९, रा. एकता नगर, ह. मु. जयहिंद कॉलनी, नंदुरबार) अशी अटकेतील आरोपींची नावे आहेत.
दोन गुन्ह्यांची उकल
उपनगर हद्दीतील घुली येथे रोहिदास फकिरा पटले (मूळ रा. पळाशी) यांच्या बंद घरातून १२ बोअरची बंदूक चोरीला गेली होती. स्थानिक गुन्हे शाखेचे वरिष्ठ पोलीस निरीक्षक हेमंत पाटील यांना या गुन्ह्याची माहिती मिळाल्यानंतर त्यांनी पथकाला निर्देश दिले. संशयित पवन चव्हाण व त्याचा मामे भाऊ सनी शिंदे यांना अटक केल्यानंतर त्यांनी चोरीची कबुली देत बंदूक तसेच गुन्ह्यात वापरलेले वाहन काढून दिले. आरोर्पीच्या अटकेने उपनगर पोलीस ठाण्यातील गुरनं. ८९/२०२५ तसेच गु.र.नं. १०५/२०२५ असे दोन गुन्हे उघडकीस आले.
यांनी केली कारवाई
ही कारवाई नंदुरबार पोलीस अधीक्षक श्रवण दत्त एस, अपर पोलीस अधीक्षक आशित कांबळे यांच्या मार्गदर्शनाखाली नंदुरबार स्थानिक गुन्हे शाखेचे वरिष्ठ पोलीस निरीक्षक हेमंत पाटील, पोलीस उपनिरीक्षक मुकेश पवार, हवालदार मुकेश तावडे, विशाल नागरे, बापू बागुल, मोहन ढमढेरे, विकास कापुरे, शोएब शेख, अभय राजपूत, रामेश्वर चव्हाण, दीपक न्हावी आर्दीच्या पथकाने केली.
