---Advertisement---
Nandurbar News : नवापूर येथील दस्तऐवजांच्या नकला काढून देण्याच्या मोबदल्यात ८०० रुपयांची लाच स्वीकारताना भूमी अभिलेख कार्यालयातील शिपाई राजेंद्र अरविंद पाटील (वय ३६) यास लाचलुचपत प्रतिबंधक विभागाच्या पथकाने रंगेहात पकडेल. तक्रारदारांची शेतजमीन कुकराण (ता. नवापूर) गावाच्या वनक्षेत्रात आहे.
जमिनीच्या हक्कासंबंधी चतुःसीमा, एकत्रीकरण व आकारबंद अशा दस्तऐवजांच्या नकला काढून देण्याच्या मोबदल्यात नवापूर येथील भूमी अभिलेख कार्यालयातील शिपाई राजेंद्र अरविंद पाटील (वय ३६) याने तक्रारदाराकडे एक हजार रुपये लाचेची मागणी केली. १३ ऑगस्टला पडताळणीदरम्यान तडजोडअंती ८०० रुपये स्वीकारण्याचे पाटील याने मान्य केले.
मंगळवारी (१९ ऑगस्ट) नवापूर येथील भूमी अभिलेख कार्यालयात पाटील याने ८०० रुपयांची लाच पंचासमक्ष स्वीकारली. याप्रकरणी पाटील याला ताब्यात घेण्यात आले असून, त्याच्याविरुद्ध नवापूर पोलिस ठाण्यात भ्रष्टाचार प्रतिबंधक अधिनियम, १९८८ अन्वये गुन्हा दाखल करण्याची प्रक्रिया सुरू होती. त्याच्या घराची झडती घेण्याची कार्यवाहीही सुरू होती. त्याचा मोबाइल ताब्यात घेण्यात आला आहे.
ही कारवाई लाचलुचपत प्रतिबंधक विभागाचे उपअधीक्षक प्रशांत भरते यांच्या मार्गदर्शनाखाली सहाय्यक पोलिस निरीक्षक विलास पाटील, हवालदार विजय ठाकरे, हेमंतकुमार महाले, जितेंद्र महाले, पोलिस नाईक सुभाष पावरा यांच्या पथकाने केली.
