---Advertisement---
Nashirabad Municipal Council Election : मतदानाचा दिवस जसजसा जवळ येतोय, तसतसा प्रचाराला वेग येत असून निवडणुकीचे वातावरण दिवसेंदिवस तापतच चालले आहे. त्याचबरोबर पडद्याआड हालचालींनाही वेग आला आहे.
प्रचार संपण्याची मुदत जवळ आल्यामुळे, उमेदवार आता थेट मतदारांच्या दारी जाऊन मतांचा जोगवा मिळवण्याचा प्रयत्न करत आहेत. या भेटीदरम्यान उमेदवारांना केवळ आपल्या योजना मांडाव्या लागत नाहीत, तर नागरिकांच्या मूलभूत समस्या आणि अपेक्षा ऐकाव्या लागतात.
समस्या त्वरित सोडवण्याचे आश्वासन देऊन, उमेदवार मतदारांचे मन वळवण्याचा प्रयत्न करत आहेत. स्थानिक कार्यकर्त्यांचा उत्साह प्रचारात रंगत आणत असून, अपक्ष उमेदवारही चिन्ह मिळाल्यामुळे जोमाने प्रचारात सहभागी झाले आहेत.
दिवस कमी, कामे जास्त
निवडणूक ही शेवटच्या क्षणापर्यंत उत्सुकता वाढवणारी आणि चुरशीची ठरणार आहे. थोड्या दिवसांत बैठकांचे आयोजन, मतदारांशी संपर्क आणि मनधरणी पार पाडण्याची कसरत उमेदवारांना करावी लागते.
पडद्याआड रणनीती
जाहीर सभांऐवजी उमेदवार पडद्याआड गुप्त रणनीतीवर अधिक लक्ष केंद्रित करत आहेत. निर्णायक मतांची जुळवाजुळव करण्यासाठी ‘सायलेंट गेम’ चालू असल्याचे दिसत आहे. प्रभावशाली व्यक्ती आणि महत्त्वाच्या कार्यकर्त्यांच्या गुप्त बैठका घेऊन मतांवर प्रभाव टाकण्याचे अंतिम प्रयत्न सुरू आहेत. काही ठिकाणी स्वतःचे राजकीय महत्त्व वाढवण्यासाठी गुप्त हालचाली सुरू असल्याचे संकेत आहेत.
विशिष्ट समाजगट किंवा भागातील गठ्ठा मते आपल्या बाजूने वळवण्यासाठी विशेष योजना आखल्या जात आहेत. काहींना आश्वासन, तर काहींना वचनपूर्ती केली जात आहे. नाराज झालेल्या स्थानिक कार्यकर्त्यांना पुन्हा सक्रिय करण्यासाठी युद्धपातळीवर काम चालू आहे.
तसेच कामासाठी बाहेर असलेल्या मतदारांना मतदानासाठी आणण्याकरिता विशेष संपर्क आणि विनंती केली जात आहे. पडद्याआड चालणाऱ्या या रणनीतींचा निकालावर मोठा प्रभाव पडण्याची शक्यता आहे, असा राजकीय विश्लेषकांचा अंदाज आहे.
