अमळनेर : सोमवार दि. २७ जानेवारी रोजी पहाटे ६ वाजेच्या सुमारास जानवे गावाजवळ अज्ञात वाहनाने गर्भवती नीलगायीला धडक दिल्याने तिचा मृत्यू झाला. शेतकऱ्यांनी पहिल्यांदा वन कर्मचाऱ्यांना नीलगाय जखमी अवस्थेत असल्याची माहिती दिली, परंतु घटनास्थळी नीलगाय सापडली नाही. काही वेळानंतर, सकाळी आठ वाजता दुसऱ्यांदा शेतकऱ्याने जखमी नीलगायीची माहिती दिली.
घटनास्थळी वन कर्मचाऱ्यांनी आणि शेतकऱ्यांनी शोध घेतला असता, एका चारचाकी वाहनाचे काच तुटलेले आणि ३० फुटाच्या अंतरावर जखमी नीलगाय सापडली. वनरक्षक रामदास वेलसे आणि जानव्याचे पशु वैद्यकीय अधिकारी थोरात यांनी घटनास्थळी भेट दिली आणि तात्काळ नीलगायीवर उपचार सुरू केले. नीलगायच्या पुढच्या पायात गंभीर दुखापत झाली होती.
त्यांना त्वरित अमळनेर येथील पशु वैद्यकीय रुग्णालयात दाखल करण्यात आले. पशु वैद्यकीय अधिकारी डॉ. रवींद्र गाढे यांनी प्रथमोपचार केले, पण दुर्दैवाने नीलगायीचा मृत्यू झाला. डॉ. गाढे यांनी सांगितले की, नीलगाय गर्भवती होती.
वनरक्षक रामदास वेलसे यांनी नीलगायीचे अंत्यसंस्कार जानव्याच्या जंगलात केले. या घटनेने परिसरात हळहळ व्यक्त केली आहे, आणि अज्ञात वाहनाच्या चालकावर कारवाईची मागणी केली जात आहे.
