---Advertisement---
Jalgaon firing : जळगाव शहरासह जिल्ह्यात गोळीबाराच्या घटनेत वाढ झाली असून, पुन्हा गोळीबार करण्यात आल्याची घटना समोर आली आहे. यात आकाश युवराज बाविस्कर उर्फ टपऱ्या याचा मृत्यू झाला, तर दोन जण जखमी झाले. गोळीबार करणारा आकाश सपकाळे हा पसार झालेला आहे.
मिळालेल्या माहितीनुसार, जुन्या वादातून संध्याकाळपासून सुरू असलेली धुसफूस वाढत जाऊन रविवारी रात्री १०.३० वाजता थेट गोळीबार करण्यात आल्याची घटना कांचन नगरात घडली. यामध्ये आकाश युवराज बाविस्कर उर्फ टपऱ्या याचा मृत्यू झाला तर दोन जण जखमी झाले.
हद्दपार आकाश सपकाळे उर्फ डोया आणि सागर सपकाळे यांच्यामध्ये जुना वाद आहे. आकाश रविवारी आला असता परिसरात संध्याकाळपासून धुसफूस सुरू होती. रात्री हा वाद वाढत जाऊन आकाश याने सागरच्या घरासमोर येऊन गोळीबार केला.
यात सागर सपकाळे यांचे भाचे गणेश सोनवणे यांच्या हाताला तर तुषार रामचंद्र सोनवणे यांच्या कानाला व आकाश बाविस्कर यांच्या छातीत गोळी लागली. जखमींना शासकीय वैद्यकीय महाविद्यालय व रुग्णालयात दाखल करण्यात आले. गोळीबार करणारा आकाश सपकाळे हा पसार झालेला आहे.
त्या ठिकाणी आकाश बाविस्कर याचा उपचार सुरू असताना मृत्यू झाला. या ठिकाणी मोठ्या प्रमाणात गर्दी झाली होती. घटनास्थळी अप्पर पोलिस अधीक्षक अशोक नखाते, उपविभागीय पोलिस अधिकारी नितीन गनापुरे तसेच शनिपेठ पोलिस ठाण्याच्या निरीक्षक कावेरी कमलापूरकर व अन्य अधिकारी, कर्मचारी दाखल झाले.
