आगामी सार्वत्रिक निवडणुकीपूर्वी पंतप्रधान नरेंद्र मोदी 14 मे रोजी वाराणसी लोकसभा मतदारसंघातून उमेदवारी अर्ज दाखल करणार आहेत. सूत्रांनी दिलेल्या माहितीनुसार, नामांकनापूर्वी 13 मे रोजी काशीमध्ये पंतप्रधान मोदींचा भव्य रोड शो आयोजित करण्यात आला आहे, जिथे ते जनतेशी संवाद साधतील आणि त्यांच्या उमेदवारीसाठी पाठिंबा गोळा करतील. भारतीय जनता पक्षाने पुन्हा एकदा पंतप्रधान मोदींना उमेदवारी दिली आहे. पंतप्रधान मोदी वाराणसीमधून हॅट्ट्रिक करण्याच्या तयारीत आहेत.
लोकसभा निवडणुकीच्या सातव्या टप्प्यासाठी उमेदवारी अर्ज भरण्याची प्रक्रिया ७ मेपासून सुरू होईल आणि १४ मे रोजी संपेल, तर वाराणसीमध्ये शेवटच्या टप्प्यातील मतदान १ जून रोजी होणार आहे. लोकसभा निवडणुकीचा निकाल ४ जून रोजी जाहीर होणार आहे.
वाराणसी मतदारसंघातून काँग्रेस नेते आणि पक्षाचे उत्तर प्रदेश प्रमुख अजय राय हे पंतप्रधान मोदींच्या विरोधात उभे आहेत. अजय राय उत्तर प्रदेशच्या वाराणसी जागेसाठी तिसऱ्यांदा लढत देत आहेत. यापूर्वी त्यांनी पंतप्रधान मोदींविरुद्ध निवडणूक लढवली होती आणि 2014 आणि 2019 च्या सार्वत्रिक निवडणुकीत त्यांना पराभवाचा सामना करावा लागला होता.
पंतप्रधान मोदी वाराणसीतून दोनदा खासदार
राय यांच्याशिवाय स्टँड-अप कॉमेडियन श्याम रंगीला यांनीही वाराणसीतून पंतप्रधान मोदींविरोधात निवडणूक प्रचार सुरू करण्याची घोषणा केली आहे. राजस्थानचे रहिवासी असलेले श्याम रंगीला हे पंतप्रधान मोदींच्या अनोख्या अनुकरणासाठी प्रसिद्ध आहेत. रंगीला यांनी बुधवार, १ मे रोजी सोशल मीडियावर लोकसभा २०२४ साठी वाराणसीमधून आपली उमेदवारी जाहीर केली.
पंतप्रधान मोदी हे वाराणसी लोकसभा मतदारसंघातून दोन वेळा खासदार आहेत. 2014 च्या लोकसभा निवडणुकीत मोदींनी पहिल्यांदा वाराणसीतून निवडणूक लढवली आणि त्यांना गंगा मातेने बोलावल्याचे सांगितले. त्या निवडणुकीत त्यांनी आम आदमी पक्षाचे उमेदवार आणि दिल्लीचे विद्यमान मुख्यमंत्री अरविंद केजरीवाल यांचा पराभव केला.
मोदींचा 13 मे रोजी काशीमध्ये रोड शो
मोदींना 581,022 मते मिळाली आणि मतदानाची टक्केवारी 56.37 होती. काँग्रेसचे अजय राय तिसऱ्या क्रमांकावर होते. त्यांना केवळ 75,614 मते मिळाली. त्याच वेळी, 2019 च्या लोकसभा निवडणुकीत पंतप्रधान मोदींना 674,664 मतांसह 63.62 टक्के मते मिळाली. त्यांच्या मतांची टक्केवारी 7.25 ने वाढली आहे. त्यांनी समाजवादी पक्षाच्या शालिनी यादव यांचा पराभव केला. काँग्रेसचे अजय राय तिसऱ्या क्रमांकावर होते. आता भाजपने त्यांना वाराणसीतून पुन्हा उमेदवारी दिली असून पीएम मोदी तिसऱ्यांदा विजयाची हॅट्ट्रिक करण्याच्या तयारीत आहेत. ते 13 मे रोजी वाराणसीला पोहोचतील आणि तेथे रोड शो करणार आहेत.
