---Advertisement---
विशेष तपास संस्थेने (एसआयए) मंगळवारी श्रीनगरम धील आठ ठिकाणी छापे टाकले. १९९० मध्ये काश्मिरी पंडित परिचारिका सरला भट्ट यांच्या हत्येप्रकरणी ही कारवाई करण्यात आली आहे. एप्रिल १९९० मध्ये झालेल्या या हत्येचा तपास करण्यासाठी एसआयएने छापे टाकण्याची ही पहिलीच वेळ आहे.
महत्त्वाची बाब म्हणजे, हे छापे माजी प्रमुख यासीन मलिक याच्या घरासह अनेक माजी कमांडरांच्या लपण्याच्या ठिकाणांवर टाकण्यात आले आहेत. काश्मिरी पंडितांवर हल्ल्यांच्या अनेक घटना उघडकीस आल्या तेव्हाचे हे प्रकरण आहे. उपराज्यपालांनी काही काळापूर्वीच १९९० च्या दशकाच्या सुरुवातीला झालेल्या काश्मिरी पंडितांच्या अनेक हत्यांचे खटले पुन्हा उघड करण्याचा निर्णय घेतला होता. या निर्णयानुसार एसआयएने ही कारवाई सुरू केली आहे. श्रीनगरमधील मैसुमा भागातील जम्मू-काश्मीर लिबरेशन फ्रंटचा माजी प्रमुख यासीन मलिक याच्या निवासस्थानावरही छापे टाकण्यात आले आहेत.
सरला भट्टची निघृण हत्या
परिचारिका म्हणून काम करणाऱ्या काश्मिरी पंडित सरला भट्ट यांचे शेर-ए-काश्मीर इन्स्टिट्यूट ऑफ मेडिकल सायन्सेसच्या वसतिगृहातून १९९० च्या दशकाच्या सुरुवातीला अपहरण करण्यात आले होते. दुसऱ्या दिवशी श्रीनगरच्या सौरा भागात त्यांचा गोळ्यांनी चाळणी केलेला मृतदेह सापडला. हा खटला सुरुवातीला निगीन पोलिस ठाण्यात नोंदवण्यात आला होता. नंतर एसआयएकडे वर्ग करण्यात आला. अलीकडेच, जम्मू-काश्मीरचे उपराज्यपाल मनोज सिन्हा यांनी हे जुने खटले पुन्हा उघडण्याचा निर्णय घेतला होता.
