Jalgaon News : पत्नी रेशन घेऊन आली अन् दरवाजा उडताच समोरील दृश्य पाहून हादरली, घटनेनं हळहळ

जळगाव : पत्नी रेशन घेण्यासाठी व मुले कामावर गेलेले असताना राजेंद्र वसंत खैरनार (५०, रा. जिजाऊ नगर) यांनी गळफास घेऊन आत्महत्या केली. ही घटना सोमवारी उघडकीस आली. या प्रकरणी तालुका पोलिसात अकस्मात मृत्यूची नोंद करण्यात आली आहे.

मिळालेल्या माहितीनुसार, जिजाऊ नगरमधील रहिवासी राजेंद्र खैरनार यांच्यासह त्यांची दोन्ही मुले फर्निचरचे काम करतात. सोमवारी मुले कामासाठी व पत्नी रेशन घेण्यासाठी गेलेली असताना घरी एकटेच असलेल्या खैरनार यांनी गळफास घेतला.

पत्नी घरी परतली त्यावेळी त्यांना पतीने गळफास घेतल्याचे दिसले. त्यावेळी त्यांना शासकीय वैद्यकीय महाविद्यालय व रुग्णालयात दाखल केले असता डॉक्टरांनी मयत घोषित केले. त्यांच्या आत्महत्येचे कारण समजू शकले नाही. या प्रकरणी तालुका पोलिसात अकस्मात मृत्यूची नोंद करण्यात आली आहे.

गळफास घेऊन वृद्धेची आत्महत्या

जळगाव : चोपडा तालुक्यातील आडगाव येथील जनाबाई शिवदास जाधव (वय ७७) यांनी गळफास घेऊन आत्महत्या केली. ही घटना २७ रोजी आडगाव येथे घडली. वृद्धेला चोपडा उपजिल्हा रुग्णालयात दाखल केले असता डॉक्टरांनी मयत घोषित केले. या प्रकरणी चोपडा शहर पोलिसात अकस्मात मृत्यूची नोंद केली आहे. आत्महत्येचे कारण स्पष्ट होऊ शकले नाही.