नवी दिल्ली : दिल्लीच्या मुख्यमंत्रीपदी रेखा गुप्ता यांची निवड झाली असून, त्या आज, गुरुवारी दुपारी १२ वाजता रामलीला मैदानावर मुख्यमंत्रीपदाची शपथ घेणार आहेत. बुधवारी दिल्ली प्रदेश भाजप कार्यालयात केंद्रीय निरीक्षकांच्या उपस्थितीत त्यांची विधिमंडळ पक्षनेतेपदी निवड करण्यात आली.
शालिमार बाग मतदारसंघातून प्रथमच आमदार झालेल्या रेखा गुप्ता यांनी मोठ्या फरकाने विजय मिळवला. त्यांचा जन्म हरयाणात झाला असून, त्या विद्यार्थी दशेपासून अखिल भारतीय विद्यार्थी परिषदेशी (ABVP) संबंधित राहिल्या आहेत. भाजपच्या संघटनात्मक कार्यात त्यांचा मोठा सहभाग राहिला आहे.
दिल्लीच्या चौथ्या महिला मुख्यमंत्री
रेखा गुप्ता या दिल्लीच्या चौथ्या महिला मुख्यमंत्री असतील. यापूर्वी शीला दीक्षित (काँग्रेस), सुषमा स्वराज (भाजप) आणि आतिशी (आप) यांनी मुख्यमंत्रीपदाची धुरा सांभाळली आहे. दिल्लीच्या राजकारणात महिलांचे नेतृत्व आणखी बळकट करण्याच्या दिशेने हा निर्णय महत्त्वाचा मानला जात आहे.
शपथविधी सोहळा भव्य-दिव्य
रामलीला मैदानावर होणाऱ्या शपथविधी सोहळ्यासाठी जय्यत तयारी सुरू आहे. या कार्यक्रमाला पंतप्रधान नरेंद्र मोदी, केंद्रीय मंत्रीमंडळातील महत्त्वाचे मंत्री, एनडीएशासित राज्यांचे मुख्यमंत्री आणि उपमुख्यमंत्री उपस्थित राहणार आहेत. मोठ्या प्रमाणावर भाजप समर्थक आणि दिल्लीकर या सोहळ्याला साक्षी राहणार आहेत.
रेखा गुप्ता यांच्या मुख्यमंत्रीपदाच्या कार्यकाळात दिल्लीतील प्रशासन आणि राजकीय समीकरणे कशी बदलतात, याकडे संपूर्ण देशाचे लक्ष लागले आहे.
