आंतरराष्ट्रीय बाजारात सोने आणि चांदीच्या किमतीवर दबाव असताना, सोमवारी (३० डिसेंबर) देशांतर्गत वायदे बाजारात वाढ दिसून आली. मल्टी कमोडिटी एक्सचेंजमध्ये सोने 136 रुपयांच्या वाढीसह 76,680 रुपये प्रति 10 ग्रॅमवर होते. शुक्रवारी सोने 76,544 रुपयांवर बंद झाले होते. या कालावधीत चांदी 186 रुपयांच्या वाढीसह 89,073 रुपये प्रति किलोवर व्यवहार करत होती.
बाजारात सोन्या-चांदीचा भाव किती?
सराफा बाजारात दागिन्यांची सततची खरेदी आणि रुपयाच्या घसरणीमुळे राष्ट्रीय राजधानीच्या सराफा बाजारात शुक्रवारी सोन्याचा भाव 350 रुपयांनी वाढून 79,200 रुपये प्रति 10 ग्रॅम झाला. व्यापाऱ्यांनी सांगितले की, रशिया-युक्रेन युद्धामुळे वाढता जागतिक तणाव आणि पश्चिम आशियातील संघर्षाच्या परिस्थितीमुळे ही सुरक्षित-आश्रय मालमत्ता मजबूत झाली आहे.
सलग चौथ्या दिवशी चांदीच्या दरात वाढ झाली. आज चांदीचा भाव 900 रुपयांनी वाढून 91,700 रुपये किलो झाला. या आठवडय़ात कमी व्यापार सत्रांसह चांदी 3,550 रुपये प्रतिकिलो झाली आहे. 99.5 टक्के शुद्ध सोन्याचा भाव गुरुवारी 78,450 रुपये प्रति 10 ग्रॅमच्या तुलनेत 350 रुपयांनी वाढून 78,800 रुपये प्रति 10 ग्रॅम झाला.
रुपयाच्या घसरणीमुळे वाढले सोन्याचे भाव
व्यापाऱ्यांच्या मते, रुपयाच्या कमजोरीमुळे सोन्यासारख्या सुरक्षित गुंतवणूक मालमत्तेची मागणी वाढली आहे. जवळपास दोन वर्षात रुपयाची सर्वात जास्त घसरण झाली आणि प्रति डॉलर 85.80 अशी आजवरची नीचांकी पातळी गाठली. यानंतर, शक्यतो मध्यवर्ती बँकेच्या हस्तक्षेपामुळे त्याची काही घसरण भरून काढण्यास मदत झाली.
मोतीलाल ओसवाल फायनान्शियल सर्व्हिसेस लिमिटेडचे कमोडिटी रिसर्च ॲनालिस्ट मानव मोदी म्हणाले की, ख्रिसमसच्या सुट्ट्यांनंतर कमी व्यवसायामुळे जागतिक स्तरावर शुक्रवारी सोन्याच्या भावात घसरण झाली. याचे कारण नवनिर्वाचित राष्ट्राध्यक्ष डोनाल्ड ट्रम्प यांनी जानेवारीत पदभार स्वीकारल्यानंतर शुल्क दर, करातील बदलांसह मोठे धोरणात्मक बदल होण्याची शक्यता आहे. जागतिक बाजारात कॉमेक्स चांदीचा भाव 0.74 टक्क्यांनी घसरून 30.17 डॉलर प्रति औंस झाला.
