वॉशिंग्टन डी.सी : अमेरिकेतील मिलवॉकी येथे सुरू असलेल्या रिपब्लिकन नॅशनल कन्व्हेन्शन सेंटरजवळ पोलिसांनी एका व्यक्तीला गोळ्या घालून ठार केले आहे. मीडिया रिपोर्ट्सनुसार, ज्या व्यक्तीवर पोलिसांनी गोळ्या झाडल्या तो व्यक्ती हातात चाकू घेऊन धमकावत होता. ज्यामुळे पोलिसांनी त्यांच्यावर गोळ्या झाडल्या. उल्लेखनीय आहे की मिलवॉकी येथे सुरू असलेल्या रिपब्लिकन पक्षाच्या राष्ट्रीय अधिवेशनात माजी राष्ट्राध्यक्ष डोनाल्ड ट्रम्प देखील उपस्थित आहेत.
ट्रम्प यांच्यावर नुकताच जीवघेणा हल्ला झाला होता, त्यानंतर रिपब्लिकन राष्ट्रीय अधिवेशनाची सुरक्षा वाढवण्यात आली आहे. या अधिवेशनातच पक्षाने अध्यक्षपदाचे उमेदवार डोनाल्ड ट्रम्प यांच्या नावाला अधिकृत मान्यता दिली. तसेच या अधिवेशनात उपाध्यक्षपदासाठी जेडी वेंस यांच्या नावावरही पक्षाने आपली मोहर लावली आहे.
पोलिसांनी सांगितले की, ४३ वर्षीय सॅम्युअल शार्प असे मृत व्यक्तीचे नाव आहे. त्याने दोन्ही हातात चाकू धरला होता आणि विस्कॉन्सिनमधील रिपब्लिकन अधिवेशनाच्या ठिकाणाजवळ एका नि:शस्त्र व्यक्तीवर हल्ला करण्याचा प्रयत्न करत होता. दरम्यान, पोलिसांनी शार्प याच्यावर गोळीबार केला. घटनास्थळावरून दोन चाकू जप्त करण्यात आले आहेत. दुसऱ्या माणसाचा जीव वाचवण्यासाठी त्यांनी शार्पवर गोळीबार केल्याचे पोलिसांनी सांगितले. मात्र, पोलिसांच्या कारवाईवर काही स्थानिकांनी नाराजी व्यक्त केली.
रिपब्लिकन नॅशनल कन्व्हेन्शनजवळील एका सशस्त्र व्यक्तीलाही पोलिसांनी अटक केली आहे. आरोपी मास्क घालून हातात एके-४७ रायफल घेऊन कार्यक्रम स्थळाजवळ फिरत होता. आरोपींकडून एक बॅगही जप्त करण्यात आली असून, त्यात काडतुसांची संपूर्ण मॅगझीनही सापडली आहे. मिलवॉकी येथे सुरू असलेले रिपब्लिकन पक्षाचे अधिवेशन चार दिवसांचे आहे. हे अधिवेशन अशा वेळी होत आहे जेव्हा माजी राष्ट्राध्यक्ष डोनाल्ड ट्रम्प यांच्यावर गेल्या रविवारी पेनसिल्व्हेनियामध्ये एका रॅलीदरम्यान जीवघेणा हल्ला झाला होता.
